Mësohet se kreu i Agjencisë Ndërkombëtare të Energjisë Atomike (IAEA), Yukiya Amano sot do të takohet në Teheran me Presidentin iranian, Hasan Ruhani.
Sipas një deklarate nga IAEA theksohet se Amano të mërkurën është nisur për në Teheran dhe të enjten do të takohet me Presidentin iranian, Hasan Ruhani dhe zyrtarë të tjerë të lartë. Në deklaratë theksohet se takimi do të mbahet në kuadër të bisedimeve në vazhdim për bashkëpunimin mes Agjencisë dhe Iranit për marrëveshjen kornizë të bashkëpunimit.
Në deklaratë gjithashtu theksohet se do të diskutohet për të rritur zgjidhjen e problemeve, të cilat përfshijnë edhe qartësimin e dimensioneve të mundshme ushtarake të programit bërthamor të Iranit.
Vizita realizohet në bazë të angazhimit të vazhdueshëm të Agjencisë me Iranin në kuadër të bisedimeve në vazhdim mes Iranit dhe vendeve 5+1.
Kontrollet përbëjnë një nga çështjet e mospajtimit në negociatat, ku vendet 5+1 kërkojnë formimin e një mekanizmi i cili parashikon inspektimin pa paralajmërim të komplekseve ushtarake të cila janë shpallur si vijë e kuqe për Iranin, takime me shkencëtarët dhe qasje në informacionet në lidhje me përmasat e kaluara ushtarake të aktiviteteve bërthamore.
Ndërsa Zv.ministri i jashtëm iranian, Abbas Arakçi, në një deklaratë për gazetarët tha të mërkurën se do të pranojnë vetëm një marrëveshje të mirë, e cila respekton vijat e kuqe të Iranit. Arakçi tha se: “Një marrëveshje e mirë është ajo që është e përshtatshme me parimet, kornizën dhe vijat e kuqe të vendosura nga lideri dhe ne jemi të gatshëm për një marrëveshje të tillë”. Pritet që negociatat të vazhdojnë deri më 7 korrik./tesheshi.com/
