Në Kosovë do të punohet edhe më 28 Nëntor për të mbyllur sa më shpejt projektin e “autostradës” energjetike drejt Shqipërisë, ndërkohë që për krijimin e kushteve të sigurisë do ketë ndërprerje të energjisë në linja lokale të Rahovecit.
“Shkyçja, nga 28 nëntor deri në 4 dhjetor 2015, nga ora 07:00 deri në 10:00 si dhe nga 13:00 deri në 16:00, bëhet për të mundësuar shtrirjen e përçuesve në linjën 400 kV Kosovë-Shqipëri”, thekson njoftimi dërguar sot nga Operatori i Sistemit, Transmisionit dhe Tregut-KOSTT. Kjo kompani publike merret me planifikimin, zhvillimin, mirëmbajtjen dhe operimin e sistemit të transmisionit të energjisë elektrike në Kosovë.
Në linjën interkonjektive 400 kV Kosovë-Shqipëri, në pjesën kosovare në fund të muajit shtator u përfundua me ngritjen e të gjitha shtyllave elektrike. Ngritja e shtyllës së fundit elektrike, 239, u bë pranë kufirit në Qafë Morinë, ndërkohë që ishin shtruar mbi 50 km përçues elektrikë.
Kryeministri Mustafa tha në gusht se Kosova dhe Shqipëria në vitin 2016 inaugurojnë “autostradën” energjetike.
Projekti për ndërtimin e linjës interkonektive 400 kV Kosovë-Shqipëri konsiston në ndërtimin e një linje të tensionit të lartë me gjatësi rreth 238 km, prej së ciles 85.5 km në territorin e Kosovës dhe 153.5 km në territorin e Republikës së Shqipërisë. Kjo linjë mbështetet financiarisht nga qeveria gjermane. /tesheshi.com/
