Katër kompani kanë dorëzuar ofertat pranë ministrisë së Transportit në garën për tenderin e operimit të rrugës së Kombit, oferta që do të hapen më 15 Shtator. Autostrada Milot Morinë pritet që pas përmbylljes së procedurave të bëhet me pagesë që do të përcaktohet në kontratën e kompanisë fituese.
Kompanitë e interesuara kanë pasur kohë deri në 23 Mars për të paraqitur ofertat e tyre, ndërsa tashmë pas 180 ditëve që ministria ka pasur në dispozicion për vlerësimin e tyre, pritet përzgjedhja.
Sipas autoriteteve, shuma më e mundshme që duhet të paguajnë qytetarët për të përdorur autostradën është pesë euro, dhe me gjasa kjo shumë do të përzgjidhet edhe në tender.
Autostrada në fjalë lidh Milotin me Morinën në kufirin me Kosovën, e përbën seksionin qendror të rrugës së Kombit që lidh Durrësin me Prishtinën. Nga të dhënat zyrtare, frekuentimi i rrugës është voluminoz dhe interesi i kompanive që do të merren me mirëmbajtjen, operimin dhe përmirësimin e saj, është i madh.
Koncensioni i rrugës jepet për 30 vjet dhe kompania fituese do të mbledhë të ardhura nga përdoruesit e saj, në këmbim të detyrimeve që parashikon kontrata për mirëmbajtjen, por edhe përmirësimin e rrugës pasi parashikohet edhe ndërtimi i një ure të re mbi lumin Drin në Kukës. /tesheshi.com/
