Kjo e martë shënoi një tjetër tragjedi. Më e pakta 11 refugjatë u mbytën kur barka e tyre u përmbys ndërsa ata qenë nisur nga brigjet turke drejt ishujve grekë. Tre prej të mbyturve ishin fëmijë.
Fatkeqët ishin nisur nga Kushadasëja, një qytet në provincën perëndimore të Ajdënit, dhe barka u përmbys për arsye ende të panjohura. Roja bregdetare turke arriti të shpëtonte vetëm shtatë prej tyre.
Ende nuk dihet nacionaliteti i viktimave, por besohet që të jenë nga Siria. Forcat turke të sigurisë ndaluan sot në të njëjtin rajon 87 refugjatë të tjerë që po bëheshin gati të lundronin gjithashtu drejt tokës greke.
Sipas të dhënave nga Organizata Ndërkombëtare për Migracionin, 706 persona kanë lënë jetën këtë vit në Egje teksa përpiqeshin të kalonin nëpërmjet detit në Europë. /tesheshi.com/
