Ministria e Jashtme ruse kuzoi autoritetet amerikane për shkeljen e drejtpërdrejt të imunitetit të diplomatëve të saj me kontrollin e planifikuar në konsullatën në San Francisko, të cilin sot do t´a kryejë FBI.
Zëdhënësja e MPJ-së Marija Zaharova deklaroi se do të bëhet kontroll edhe në banesat e të punësuarve në konsullatën ruse.
SHBA-ja i dha urdhër Rusisë që sot të mbyllë konsullatën në San Francisko, si dhe dy objekte në Nju-Jork dhe Uashington, si përgjigje ndaj asaj që Moska zvogëloi personelin diplomatik amerikan në Rusi.
“Kërkesa e autoriteteve amerikane paraqet kanosje të drejtpërdrejtë për sigurinë e shtetasve rusë”, theksoi Zaharova.
Ajo shtoi se “SHBA-ja vazhdon me përkeqësimin e atmosferës tashmë të tensionuar në dialogun me Rusinë duke ndërmarrë aksione të tilla”.
“E kundërshtojmë ashpër hapin e Uashingtonit me të cilin injorohet e drejta ndërkombëtare, ndërsa siç është e zakonshme në praktikën diplomatike, ne e ruajmë të drejtën për t´u kthyer. Kjo nuk është përzgjedhja jonë, por jemi të detyruar”, shtoi Zaharova.
Paraprakisht shefi i diplomacisë ruse, Sergej Lavrov deklaroi se Moska është duke përgatitur një “përgjigje të ashpër” ndaj vendimit të SHBA-së.
Diplomatët rusë tashmë kanë filluar të braktisin objektin e konsullatës në San Francisko. Ata kanë nxjerrë kuti kartoni nga objekti dhe i kanë vendosur në automjete.
Disa orë paraprakisht një smog i dendur dhe i zi doli nga oxhaku i konsullatës, por nëpunësit rusë nuk kanë lejuar zjarrfikësit të hyjnë në objekt.
Sipas disa mediave perëndimore, në vatrën e konsullatës janë djegur sende të paidentifikuara. /tesheshi.com/
