Pas kërkesës për dorëheqje të parevokueshme nga ana e kritikëve Lulzim Bashës kanë nisur t’i dalin në mbrojtje të vetët.
I pari që reagoi ishte deputeti i listës së Vlorës, biznesmeni Agron Shehaj, një i ri në PD si prutje e Bashës.
Shehaj shprehet se: “Ata që sakrifikuan partinë, vetëm për të parë të rrëzuar kryetarin, i cili vendosi, me të drejtë, t’u ndërpresë, jo marrëdhënien me partinë, por ofiqet, sot flasin në emër të PD.Humbja është edhe e tyre, por ata nuk e pranojnë. Sepse, në çdo humbje ka edhe të shkuar”.
Duke i cilësuar si ish-pushtetarë Shehaj shkruan më tej se “Dua të ndaj një ‘kujtim’ të një demokrati nga Novosela, i cili më tha se kur shtëpitë u ishin përmbytur nga Vjosa, mori në telefon një prej ‘firmëtarëve’ të listës antiBasha. E dini cila ishte përgjigja e tij? “Jam i sigurt se do të mbijetoni edhe kësaj here”. Ata ish-ministra, ish-drejtorë, isha që bëjnë ‘ish’ se u ka ikur veza e pulës së pushtetit, janë problemi, dhe jo zgjidhja.”
Një tjetër mbrojtje pak më e moderuar ka ardhur nga Besnik Aliaj, i cili ishte kandidat për deputet por nuk arriti të zgjidhej.
Edhe ai fajëson kritikët për një pjesë të humbjes, por thotë se duhet të ketë analizë dhe përmirësim.
“Ne u braktisëm nga qefmbeturit. Por përtej këtyre kjo do të thotë që edhe vetë duhet të përmirësohemi, sepse beteja vijon. Edhe pse partia është tani më e ndarë se kurrë vijon detyrimi jonë moral për të ruajtur kontaktet me njerëzit e thjeshtë, por edhe me bazën e PD-së”-shkruan ai./tesheshi.com/
