Mbreti Selman i Arabisë Saudite shkeli të shtunën në tokën franceze së bashku me shpurën e tij prej 1000 personash, për të pushuar në brigjet e rivierës së famshme të vendit europian. Por kushtet e rrepta të sigurisë që e shoqërojnë vizitën e tij, si dhe mbyllja e një plazhi, kanë nxitur protesta mes vendasve.
Një peticion kundër mbylljes së plazhit publik në Vallauris është nënshkruar nga 100.000 persona. Autoritetet e mbyllën plazhin për të shmangur çdo incident, gjë që është kundërshtuar nga banorët. Në peticion thuhet se plazhi duhet të jetë “i disponueshëm për të mirën e të gjithëve.”
Ndryshe banorëve, poseduesit e restoranteve, hoteleve dhe të dyqaneve të luksit përgjatë bregut mesdhetar e kanë pritur krahëhapur vizitën, me shpresën se një masë e tillë e madhe njerëzish me fuqi të jashtëzakonshme blerëse do të ketë ndikim të drejtpërdrejtë në ekonominë lokale.
Mbreti me rrethin e tij të afërt qëndrojnë në vilat buzë bregut, ndërsa 700 të tjerët kanë zënë vend në hotelet luksoze të rivierës franceze.
Tre javë mendohet të jetë koha e qëndrimit të mbretit Selman në bregdetin francez, ndërsa në atë pjesë të plazhit ku ai mendohet të pushojë po vihet dhe një ashensor i përkohshëm, për të mundësuar zbritjen dhe ngjitjen e tij. /tesheshi.com/
