Mbreti Selman i Arabisë Saudite do të udhëtojë javën e ardhshme drejt SHBA-ve, në të parën vizitë të tij, me ftesë të presidentit amerikan, Barack Obama.
Monarku saudit do të pritet në 4 shtator në Shtëpinë e Bardhë nga presidenti amerikan, dhe në bisedime do të diskutohet për situatën në Jemen e në Siri, si dhe për marrëveshjen bërthamore me Iranin e për veprimet e këtij të fundit për destabilizimin e rajonit.
Zëdhënësi i Shtëpisë së Bardhë, Josh Earnest, u shpreh mes të tjerash në njoftimin e vizitës së mbretit saudit se, “Vizita e tij vë në pah rëndësinë e partneritetit strategjik midis Shteteve të Bashkuara dhe Arabisë Saudite.”
Gjithnjë sipas zëdhënësit, dy udhëheqësit do të përqendrohen në rrugët për t’i forcuar marrëdhëniet mes dy vendeve, duke përfshirë sigurinë e përbashkët.
Mbreti i Arabisë Saudite do të marrë pjesë gjithashtu në një forum amerikano-saudit që do të mbahet në Uashington më 4-6 shtator, e ku në qendër të vëmendjes do të jenë sektorë të tillë si energjia, shëndeti, lëndët petrokimike dhe shërbimet financiare.
Selmani qe i munguari i madh në një takim të presidentit amerikan në majin e këtij viti, në Kemp Dejvid, me udhëheqësit e vendeve të Gjirit Persik, duke dërguar në vend të tij princin e kurorës dhe ministrin e Mbrojtjes.
Arabia Saudite është një prej aleatëve më të fuqishëm të SHBA-ve në rajon.
Vizita e mbretit të Arabisë Saudite vjen pasi fuqitë botërore nënshkruan një marrëveshje me Iranin për frenimin e programit bërthamor. Vendet e Gjirit Persik druhen se një Iran pa sanksione do të kërkojë ta trazojë më tej rajonin.
Para kthimit në vendin e tij, mësohet se mbreti Selman do të vizitojë dhe Egjiptin. /tesheshi.com/
