Vera e këtij viti pritet të jetë me të vërtetë shumë “e nxehtë” për klubet. Parashikohen lëvizje shumë të bujshme, madje që mund të jenë edhe rekord në historinë e futbollit. Me heqjen e “fair-play”-t financiar, disa pronarë ekipesh kanë ndër mend të realizojnë të gjitha ëndrrat e tyre mbi transferimet. Dhe, për ta bërë këtë, nuk do të njohin as limite financiare. Por, pa filluar akoma faza e zjarrtë, nuk kanë munguar shpenzimet e paparashikuara.
Klubi që kryeson listën është Valencia. Me ardhjen e Peter Lim si aksioner, klubi rifitoi stabilitetin ekonomik dhe ka nisur zbatimin e projektit për një ekip dinjitoz në Champions. Një pjesë e mirë e afrimeve janë futbollistë që u huazuan në mesin e edicionit të kaluar, me të drejtë blerje në verë. Klubi spanjoll ka shpenzuar plot 102 milionë euro deri tani dhe bëhet fjalë për dy sulmuesit Rodrigo e Negredo, të cilët kushtuan nga 30 milionë euro secili, talentet Andre Gomesh dhe Zhoao Kanselo që kushtuan nga 15 milionë euro apo Santi Mina (10 mln). Në vendin e dytë pozicionohet Juventusi me 67.5 mln, katër më shumë se Liverpuli që zë postin e tretë. Bardhezinjtë kanë shpenzuar shumë për lojtarë si Paulo Dybala dhe Mario Manxukiç, ndërsa anglezët për Firminjon apo Klajn.
Të dyja këto skuadra nuk i kanë mbyllur afrimet, pasi presin të bëjnë të tjera goditje. Vendi i katërt dhe i pestë u takon klubeve milaneze, Milani dhe Interi. Në mënyrë të papritur kanë realizuar transferime shumë të kushtueshme, edhe pse është përfolur për një krizë financiare. Synimi i drejtuesve respektivë është për të rikthyer skuadrat në nivelin që u takon dhe pse jo të pretendojnë titullin.
Lojtarët – Edhe pse disa klube kanë “hapur thesin” për të realizuar objektivat e tyre, akoma nuk janë zyrtarizuar mjaft transferime të përfolura deri tani. Nga Italia rrezikohet të largohen futbollistë si Pol Pogba apo Arturo Vidal, të cilët mund të kapin shifra të çmendura. Nga ana tjetër, pikëpyetjet janë te lëvizjet që do të bëjë Reali i Madridit sa u përket largimeve. Është përfolur se merengesit mund të largojnë një yll dhe në listë hyjnë emra si Ronaldo apo Garet Bejl, që janë në shënjestrën e sheikëve të Mançester Sitit apo PSG-së. Aktualisht janë ende në statusin e fantazisë, por duke ditur potencialet financiare dhe precedentëve, asgjë nuk është e pamundur. Kjo verë pritet shumë e nxehtë… /tesheshi.com/
