Përpara se lojtarët e përfaqësueseve të kthehen në klubet e tyre pas ndeshjeve eliminatore për Botërorin, ata do të luajnë në takimet miqësore të kësaj të marte.
Itali – Gjermani dhe Angli – Spanjë janë dy miqësoret që tërheqin më shumë vëmendjen.
Italia dhe Gjermania do të takohen për herë të parë që prej Europianit të Francës. Italianëve akoma u djeg ai eliminim me 11-metërsha në çerekfinale, dhe sonte do të kenë mundësi në “San Siro” të Milanos që të marrin paksa hak.
Të dy ekipet vijnë pas dy ndeshjeve të lehta dhe fitoreve të thella në eliminatore; Italia do të fitonte 0-4 me Lihtenshtajnin, ndërsa Gjermania do t’ shënonte dyfishin e golave San Marinos.
Në “Wembley” të Londrës kanë për t’u përballur në orën 21:00 Anglia me Spanjën.
Anglia doli fituese ndaj Skocisë të premten, në derbin britanik, kurse Spanja vjen në këtë takim pas fitores 4-0 ndaj Maqedonisë.
Po sot luhen dhe shumë miqësore të tjera, si, Rusi – Rumani, Hungari – Suedi, Ukrainë – Serbi, Çeki – Danimarkë, Austri – Sllovaki, Irlandë e Veriut – Kroaci, Francë – Bregu i Fildishtë. /tesheshi.com/
