Një peticion i publikuar në faqen elektronike të parlamentit britanik kërkon arrestimin e kryeministrit izraelit për krime lufte. Peticioni që bën thirrje për arrestimin e Netanjahut muajin e ardhshëm, kur ai të mbërrijë në Londër për një vizitë zyrtare, e akuzon atë për mijëra të vdekur palestinezë prej mësymjes izraelite vitin e shkuar në Gaza.
Izraelitët nisën një ofensivë ushtarake në 2014-ën në Rripin e Gazës, të kontrolluar nga Hamasi. Sipas vlerësimeve të OKB-së, gjatë ofensivës humbën jetën 2.200 palestinezë, duke përfshirë 550 fëmijë.
Peticioni shprehet pa mëdyshje, “Benjamin Netanjahu do të zhvillojë bisedime këtë shtator në Londër. Nën ligjin ndërkombëtar, ai duhet të arrestohet për krime lufte me të mbërritur në Mbretërinë e Bashkuar, për masakrën e mbi 2.000 civilëve në vitin 2014.”
Peticioni është nënshkruar prej së mërkurës nga 42.149 qytetarë britanikë. Sipas vetë faqes elektronike ku është publikuar peticioni, qeveria britanike duhet t’u përgjigjet të gjitha peticioneve që nënshkruhen nga mbi 10.000 persona. Sa i përket parlamentit, peticioni duhet të ketë 100.000 nënshkrime që ai të merret për shqyrtim e të debatohet mbi të.
Parashikohet që peticioni në faqen elektronike të parlamentit britanik të jetë i hapur për nënshkrime gjer më 7 shkurt të vitit që vjen. /tesheshi.com/
