Vizita e kryeministrit izraelit, Benjamin Netanyahu, në Britaninë e Madhe qe lajmëruar më herët se nuk do të përcillej aq qetë, ndërsa një peticion për arrestimin e tij për krime lufte u nënshkrua nga mijëra njerëz.
Në vazhdën e zemërimit për vizitën e tij, qindra protestues në përkrahje të Palestinës u mblodhën dje para rezidencës së kryeministrit britanik në Downing Street, duke lëshuar thirrjet “Arrestoni Netanyahu”-n dhe “Kriminel lufte”.
Në kundërpërgjigje ndaj tyre, pati dhe një grumbullim të mbështetësve të Izraelit në të njëjtin vend. Policia u përpoq të shmangte përplasjen, e arrestoi më së paku dy persona, teksa pati një nxehje të gjakrave e shkëmbim thirrjesh mes dy grupimeve.
Netanyahu ka arritur dje në Londër, por vetëm sot, në orët e para të ditës, do të takohet me homologun e tij, David Cameron-in.
Në axhendën e bisedimeve janë një sërë çështjesh, duke filluar nga Siria, Shteti Islam, Irani, si dhe procesi diplomatik me palestinezët.
Protestën propalestineze e organizoi Fushata e Solidaritetit Palestinez, e cila i pati kërkuar Cameron-it ta anulonte vizitën, e të vinte sanksione dhe embargo armësh ndaj Izraelit.
Sipas kësaj organizate, Netanyahu ka përgjegjësi të drejtpërdrejtë për krimet e luftës të identifikuara nga Këshilli i të Drejtave të Njeriut i OKB-së pas sulmit brutal mbi Gaza verën e shkuar, ku gjatë shtatë javëve u vranë më tepër se 2.000 burra, gra e fëmijë palestinezë. /tesheshi.com/
