Fluksi ditor i refugjatëve sirianë e irakenë që mbërrijnë në Europë vlerësohet në 8 mijë në ditë e me gjasa pritet të vijojë edhe në muajt në vazhdim. OKB ka “matur” në këtë mënyrë intensitetin e krizës së refugjatëve, ndërsa një kordinator rajonal për refugjatët i dha këtë shifër agjencisë Reuters.
Amin Awad tha se më shumë se 5 mijë refugjatë mbërrijnë për cdo ditë në Greqi. Ky fluks mund të vazhdojë edhe gjatë dimrit nëse moti mbetet I mirë dhe kufijtë të hapur, tha nga ana e saj IOM.
Rreth gjysmë milioni refugjatë, kryesisht nga Siria dhe vendet e tjera të përfshira nga konflikti në Lindjen e Mesme dhe në Afrikë, tashmë kanë mbërritur në Europë vetëm këtë vit.
Ndër shifrat e tjera që ofron OKB është se 10 milionë irakenë do të jenë në nevojë humanitare deri në fund të vitit.
Europa është dakordësuar për rishpërndarjen e 120 mijë refugjatëve, të cilët do të merren nga kampet e superpopulluara e pa kushtet minimale në Itali e Greqi drejt vendeve të tjera anëtare.
Katër shtete europiane kanë votuar kundër vendosjes së kuotave për refugjatët, ndërsa vijojnë grindjet mes shteteve kufitare për fluksin e refugjatëve. /tesheshi.com/
