Mediat serbe dhe portalet tona kanë dhënë me pompozitet lajmin e lindjes së foshnjës së parë në maternitetin e Preshevës.
Një lajm vertëtë i gëzueshëm. Por ky kumt e ka një kleçkë brenda, pasi shumë nëna të Luginës së Preshevës sërish marrin rrugën e gjatë për në Vranje, përkatësisht 42 kilometra, ose më shumë se gjysëm ore rrugë me makinë të mirë.
Materniteti i Preshevës, nuk është i tillë por thjesht një ambulancë, ku ka krevate lindjeje dhe një aparat inkubatori për trajtim intensiv të foshnjës.
M. Ramadani, një student i mjeksisë në Universitetin e Tiranës, i tha tesheshi.com se problem kryesor i kësaj shtëpie-lindjeje është se aty nuk mund të bëhen operacione çezariane. Të cilat janë adekuate dhe mund të vendosen nga mjeku jo vetëm ditë përpara lindjes, por edhe pak përpara lindjes, pra sapo janë shfaqur dhimbjet apo gjatë procesit. Dhe nëse do të ketë komplikacione, pasojat janë mjaft të rënda. Mjeku i ri shton se shtëpitë ambulatore, kryesisht në fshatra afër qyteteve funksionojnë për raste urgjente dhe nëse ka komplikacione mund të dërgohet me shpejtësi në spital nga shërbimi i urgjencës.
Në këtë rast largësia deri në Vranjë është e madhe, rreth 42 kilomentra nga qyteti i Preshevës, ndërkohë nga fshatrat e Luginës situata bëhet më e komplikuar.
Vetë Kryeministri serb Vuçiç ka vizituar këtë maternitet para dy javësh, ndërsa sapo ishin mbyllur punimet. Madje ironizoi dhe ndihmën e dhënë nga qeveritë e Tiranës dhe Prishtinës. Siç bën të ditur “Presheva.com”, në maternitetin jashtëspitalor të Preshevës, pas 27 viteve ka lindur foshnja e parë, djalë që e quajtën Mert, me peshë 4 kilogram.
Drejtori i shtëpisë së shëndetit në Preshevë, Mitat Sahiti tha se: “materniteti jashtëspitalor në Preshevë funksionon 24 orë, si personel ka edhe 3 mjekë specialistë nga qendra spitalore e Vranjës së bashku me 3 mjekët që punojnë në Preshevë”.
Dr Sahiti theksoi se hapja e maternitetit në Preshevë ka rëndësi të madhe pasi në territorin e Luginës lindin nga 350 deri 400 foshnje në vit, dhe tani do të ketë më pak harxhime, si dhe ajo më e rëndësishmja komunikimi në gjuhën amtare ndërmjet pacientëve dhe ekipit mjeksor që do ta drejtojnë lindjen.
Por, ç’të keqe kishte ndërtimi i një salle operatore, aq më shumë se kuadrot që përgatiten në Tiranë janë shumë?! Vetëm në Universitetin e Tiranës po specializohen për mjekë obsetër mbi 20 specializantë. /tesheshi.com/
