Siguria e Edi Ramës për të miratuar në Kuvend reformën në Drejtësi me 94 vota, insistimi i BE-së dhe SHBA-së për ta bërë këtë sa më shpejt, si dhe paniku i PD-së se kjo mund të ndodhë realisht, janë një opsion matematikisht i mundur.
Dhe për këtë i referohemi shifrave zyrtare të grupeve parlamentare në Kuvend, por edhe deputetëve të paangazhuar.
Fronti pro reformës
Sipas deklarimeve paraprake të liderëve politikë në Kuvend dhe kompozimit të grupeve, situata është kjo:
Partia Socialiste ka 61 deputetë në grupin e saj parlamentar plus 2 deputetë që i ka dhënë borxh te grupi i PDIU-së 63.
LSI ka 18 deputetë në grupin e saj, plus 2 që i ka dhënë borxh te PDIU për të formuar grupin, bëjnë 20. PDIU vetë nga ana e saj ka 5 deputetë.
Deputetët e Mazhorancës gjithsej: PS-63+ LSI-19+ 5 të PDIU-së bëjnë 87 deputetë.
Por në Kuvend bën pjesë edhe “grupi i të pa-angazhuarve” që janë deputetët të cilët nuk janë regjistruar në ndonjë grup parlamentar apo të përjashtuar nga grupet e tyre.
Këta deputetë janë:
Tom Doshi
Armando Prenga
Mirela Ferracaku
Vangjel Dule
Nard Ndoka
Mimoza Hajdarmataj
Alban Zeneli
Dashamir Tahiri
Nga këto 8 deputetë, katër syresh sië janë Doshi, Prenga, Dule dhe Ferracaku, kanë deklaruar votën pro reformës në Drejtësi.
Pra 87 + 4 = 91 vota.
Fronti kundër reformës
Partia Demokratike, ka zyrtarisht në grupin e saj të regjistruar parlamentar 38 deputetë.
Pesë deputetë i ka dhënë borxh tek Partia Republikane që bëjnë 43 deputetë, shto këtu Alban Zenelin, Mimoza Hajdarmatajn, Dashamir Tahirin dhe Nard Nokën që janë tek “të paangazhuarit”, bëjnë 47 deputetë.
Nëse i shtojmë dhe dy republikanët, Fatmir Mediu dhe Agron Duka, opozita ka 49 deputetë.
Shuma finale
“Pro” reformës janë 91 deputetë, ndërsa kundër “49”. Që të miratohen ndryshimet kushtetuese, mazhorancës i duhen vetëm 3 deputetë.
Ditën e djeshme, në takimin me aleatët që zhvilloi Basha, Agron Duka nuk mori pjesë dhe tashmë ai nuk është më me Partinë Republikane pasi ka marrë drejtimin e Partisë Agrare.
Ndërkaq, Nard Ndoka nuk u shpreh se do të votojë kundër reformës siç deklaroi Fatmir Mediu.
Pra bëhet fjalë për një deputet. Por ditët e fundit flitet se janë 10 parlamentarë të opozitës që mund të votojnë reformën në drejtësi dhe këtu u përmendën: Eduard Selami (më i irrituari me karshillëkun që sipas tij lidershipi demokrat po i bën Perëndimit për reformën në Drejtësi), Majlinda Bregu, Astrit Patozi, Florion Mima, Astrit Veliaj, Bedri Mihaj, Irma Kopliku. /tesheshi.com/
