Presidenti amerikan, Barack Obama reagoi me zemërim ndaj masakrës në Oregon duke thënë se Amerika ka bërë “një zgjedhje politike” për të lejuar ngjarje të tilla. Ai akuzoi Shoqatën Kombëtare të armëve se ka lobuar për të bllokuar reformën e administratës së tij për ligje më të ashpra në kontrollin e armëve.
Obama i bëri këto komente në Shtëpinë e Bardhë, në një konferencë për mediat, ku është shfaqur i trishtuar dhe i frustruar. Ai sfidoi votuesit amerikanë të të gjithë krahëve, të mbajnë përgjegjës liderët e tyre nëse dëshirojnë që tragjedi të tilla të mos ndodhin më.
“Kjo është një zgjedhje politike që ne bëjmë, lejojmë që këto të ndodhin një herë në disa muaj në Amerikë”, u tha Obama gazetarëve pas masakrës më të fundit në një kolegj ku u vranë nëntë persona përpara se policia të qëllonte për vdekje atentatorin.
“Në mënyrë kolektive, duhet të mbajmë përgjegjësi për familjet që humbën të dashurit e tyre, për shkak të mosveprimit tonë”, tha Obama.
Presidenti demokrat nxiti ligje për kontroll më të ashpër të armëve në Shtetet e Bashkuara që nga masakra e Newtown ku u vranë fëmijë në një shkollë, ngjarje që tronditi gjithë vendin. Mirëpo asgjë nuk u konkretizua e që prej asaj kohe, ka pasur edhe vrasje të tjera masive në Amerikë.
Më herët, Obama e kishte cilësuar frustrimin më të madh të mandatit të tij pamundësinë e miratimit të ligjeve për kontrollin e armëve në Amerikë. /tesheshi.com/
