Me qëllim që t’ju ndihmohet qytetarëve të Shkupit të cilët relaksohen në Vodno, mali më i afërt prej kryeqendrës, autoritetet këtë vikend siguruan transport falas për qytetarët. Për çdo vikend dhe festë zyrtare në Vodno, vizitorët mund të shkojnë vetëm me autobus.
Kjo ndalesë nuk vlen për makinat e policisë, ambulancës, shtabeve të emergjencës, ose ata që paraprakisht kanë marrë leje për t’u ngjitur me makinë në Vodno.
Si masë mbrojtëse kundër ndotjes së ajrit, problem brengosës për shkupjanët, është lajmëruar se kur ka rritje të grimcave substancave ndotëse në ajër, transporti i të gjitha linjave në transportin publik urban dhe ndërurban të kryhet falas.
Kryetar i Shkupit, Petre Shilegov thotë se kjo nuk e zgjidh problemin e ndotjes së ajrit, por është një nga masat afatshkurtëra e ndërmarrë nga qyteti i Shkupit.
“E çliruam Vodnon nga makinat. Në përputhje me ndalesën për lëvizjen e makinave deri në Vodno gjatë fundjavave dhe festave shtetërore, siç filluam edhe sot, këtu arritëm duke përdorur autobusët e ndërmarrjes Publike Qarkulluese, pa pagesë”, tha Shilegov.
Ata që vijnë shpesh në këtë mal e vlerësojnë pozitivisht këtë vendim.
“Sot erdhëm me autobus, siç është rendi dhe gjithçka është mirë. Nuk e di nëse kjo gjë do të zgjidhë ndonjë gjë, megjithatë është mirë, do të mësohemi të vijmë kështu, sepse kur vinim me makinë nuk ishte edhe aq mirë, kishte shumë trafik”, tha një qytetar.
Njëherit Shilegov theksoi se ditëve me nivel të lartë ndotjeje, do të shtrenjtohen parkingjet ndërsa do të zvogëlohet çmimi i biletës së autobusit, me qëllim që njerëzit të nxiten ta përdorin transportin publik dhe t’i lënë makinat në shtëpi, kurse se planifikohet që kjo masë të vlejë përgjithnjë dhe jo vetëm për periudhën e dimrit.
Miradie Hasani – /tesheshi.com/
