Senatori amerikan Ron Johnson, i cili vizitoi Kosovën dhe Serbinë javën e kaluar, tha se nënshkrimi i marrëveshjes në tavolinën e dialogut është më i miri, ndonëse mund të mos i pëlqej asnjërës palë.
Për Zërin e Amerikës, Johnson tha se rruga e dialogut është në duart e liderëve të dy vendeve, dhe se vendimi i fundit u takon atyre.
Ai pohoi se si Prishtina ashtu edhe Beogradi kërkojnë prani më të madhe amerikane në rajon, duke ua kujtuar autoriteteve kosovare dhe serbe se kjo veçse po ndodhë, pasi kjo është hera e katërt që takohet me presidentët e të dyja vendeve.
Por Johnson mohon kategorikisht se do të ketë “forma të imponimit” sa i përket arritjes së kompromisit, duke përforcuar edhe më tej deklaratat e përfaqësuesit të SHBA-së për Ballkanin Matt Palmer se Kosova dhe Serbia kanë të drejtë të kenë politika të pavarura, dhe se SHBA nuk i prek ato.
Johnson përmbylli mendimet e tij për “ngërçin ballkanik” me deklaratat se fokusi në zhvillimin e ekonomisë dhe lirisë së lëvizjes liron automatikisht problemet historike që ngulfatën rajonin. /tesheshi.com/
