Ministri i Tregtisë dhe Industrisë i Kosovës, Endrit Shala dhe Ministri i Ekonomisë i Maqedonisë Veriore, Kreshnik Bekteshi, të martën ranë dakord për masa që do të kapërcejnë pengesat në tregtinë e produkteve të caktuara midis dy vendeve.
Për shkak të tarifave që Maqedonia Veriore vendosi ndaj Kosovës për importin e peshkut dhe produkteve të tij në qershor, Kosova ndaloi importet e mjaltit dhe patateve nga Maqedonia Veriore si masë reciproke javën e kaluar.
Kjo ishte arsyeja që delegacioni i Maqedonisë Veriore vizitoi Prishtinën të martën.
Pas një takimi dyorësh, ministri Shala deklaroi se kishte rënë dakord me kolegun e tij Bekteshi që Agjensia e Veterinarisë dhe Ushqimit e Kosovës të dërgojë garanci shtesë në Maqedoninë Veriore në lidhje me produktet e diskutueshme, megjithëse Kosova nuk ka obligime të tilla përkundrejt vendeve të tjera të CEFTA-s.
Shala sqaroi se Agjensia e Veterinarisë dhe Ushqimit e Kosovës do të sigurojë deri të premten një program aktiv monitorimi për peshqit dhe vezët e peshkut, të cilat Kosova eksporton në Maqedoninë Veriore, me qëllim që ta lehtësojë më vonë Maqedoninë për tregtimin e këtyre produkteve në tregun e BE-së.
“Ne kemi rënë dakord që deri në fund të kësaj jave, Agjensia e Veterinarisë dhe Ushqimit e Kosovës të kryejë detyrat e saj dhe pas kësaj Agjensia e Veterinarisë në Maqedoninë Veriore do të heq barrierën që ka ndaj Kosovës”, tha Shala.
Ministri Bekteshi tha se ai argumentoi pse Maqedonia Veriore vendosi tarifa dhe se këto masa u vendosën jo vetëm për Kosovën, por për të gjitha vendet që nuk monitorojnë vezët e peshkut, me qëllim që vendi i tij të mund të aplikojë për eksport në vendet e BE-së.
“Ne u pajtuam me ministrin Shala që në periudhën e ardhshme, Agjencia e Veterinarisë dhe Ushqimit e Kosovës të përgatisë një program monitorimi për produktet që përmendëm, dhe kur ajo agjenci të dëshmojë se programi ka filluar, me siguri, ne si qeveri ose Agjensia e Maqedonisë Veriore, do të lejojmë duke importuar këto produkte në vendin tonë”, tha Bekteshi.
Të dy ministrat ranë dakord që tregtia, por edhe çdo lloj bashkëpunimi tjetër, ndërmjet Kosovës dhe Maqedonisë Veriore duhet të zgjerohet. /tesheshi.com/
