Nga Blendi Gashi
Drejtori i të ashtuquajturës Zyrë për Kosovën në qeverinë e Serbisë, Marko Gjuriq, pavarësisht vendimit të qeverisë së Prishtinës për të mos hyrë në Kosovë, ai shkeli sërish në territorin e saj, ku përmes rrugëve alternative hyri në veri dhe më pas i papenguar mori pjesë në përurimin e karburanti dhe një objekti të industrisë së naftës të Serbisë në pjesën veriore të vendit,
Gjuriq, përveç që ua bëri me dije institucioneve kosovare se në këtë pjesë ligjin e bëjnë strukturat paralele serbe, ai për më tepër u tall keq me kryeminsitri, Isa Mustafa.
I pyetur nga gazetarët se si arriti në veri të Mitrovicës?, ai ka thënë: “Sido që të jetë, unë jam i detyruar që këto ditë të jem në Kosovë, të lëvizi si Isa Mustafa”.
Pra, përmes kësaj deklarate Gjuriq ja ka bërë të ditur në një mënyrë indirekte kryeministrit Mustafa se nëse ai nuk lëviz i lirshëm në këtë pjesë një gjë të tillë s’mund ta bëj as kreu i ekzekutivit kosovar.
Ky rast tregon më së miri pafuqinë e institucioneve të Kosovës, njëherësh dhe të policisë, pasi Gjuriq as nuk guxoi të preketa.
E pafuqishme për të ndaluar vizitën e Gjuriqit në Kosovë, Ministria e Punëve të Jashtme përmes një kumtese ka reaguar duke thënë se hyrja ilegale në Kosovë është kundër marrëveshjes për vizitat e ndërsjella të arritur në Bruksel, të cilat duhet të aprovohen apo ndalohen nga institucionet e të dyja shteteve të paktën 24 orë më herët.
MPJ ka bërë të ditur se i ka nisur tashmë një notë proteste në BE dhe të gjitha institucioneve ndërkombëtare për këtë sjellje të papranueshme të Gjuriq dhe ka koordinuar hapat e mëtejshëm me institucionet relevantë në Kosovë.
Ndërkaq, krejt çfarë ka bërë policia është suspendimi i dy zyrtarëve policorë për 48 orë, komandantit të policisë në Mitrovicën e veriut, Goran Zhivkoviq dhe shefi i operativës, Milija Milosheviq, pasi këta të fundit kanë refuzuar zbatimin e urdhrit për arrestim e Gjuriqit.
Por (mos) veprimet e shtetit të Kosovës i kritikojnë ashpër opozita dhe analistë në vend, ndërsa deputet të mazhorancës nuk preferojnë të komentojnë shumë për çështjen në fjalë.
Deputetja e PDK-së pret reagimin e BE-së
Deputetja e PDK-së, Xhevahire Izmaku nuk dëshiron të komentojë shumë hyrjen ilegale të Gjurqit dhe të fajësoi qeverinë apo policinë, por çështjen në fjalë më shumë e sheh politike se sa operative.
“S’është hera e parë që hynë në këtë mënyrë. E shoh si një rast të izoluar, duke pasur parasysh se ka probleme më të mëdha siç është ndërtimi i murit. Jemi para vendimeve të mëdha. Pres reagimin e qeverisë por më shumë të Bashkimit Evropian. Po pres edhe unë po pres reagimin”, ka thënë deputetja Izmaku, për tesheshi.com, duke folur për ngjarjet e fundit në veri
Opozita: Shteti jo funskional, nota e protestës t’i dërgohet Serbisë jo BE-së
Nënkryetari i AAK-së, Ahmeti Isufi, thotë se hyrja ilegale e Gjuriqit në veri dhe mosarrestimi i tij, si dhe nga ana tjetër mosëvizja e lirshme e kryeministrit në gjithë territorin e shtetit, tregon qartë se qeveria e Kosovës nuk është e përgjegjshme për rolin që e ka, andaj duhet të shkoj dhe të mbahen sa më parë zgjedhjet e parakoshme.
“Një shtet i cili ndalon një personalitet të hynë në territorin e tij dhe i njëjti nuk respekton ndalesën, dhe më pas qeveria nuk e bën veprimin e duhur, tregon qart se ai shtet nuk funskionon. Prandaj kryeminsitri dhe qeveria bartin çdo pasojë për cenimitn e sovraniteit të shtetit”, thotë Isufi, për tesheshi.com
I pyetur për dërgimin e notes së proteste nga MPJ në BE, zëvendësi i Haradinajt thotë se bota e protestës nuk duhet t’i dërgohet Bashkimit Evropian por Beogradit dhe duhet të merren të gjitha masat që autoriteteve serbe t’iu ndalohet me të vërtetë hyrja në Republikën e Kosovës.
Politikë si në vitet e 90-ta…
Por, analistë politikë, dërgimin e notave proteste në BE nga institucionet e Kosovës e shohin si një hap të gabueshëm.
Arben Qirezi, njohës i rrethanave politike thotë se dërgimi i notave të protestës në BE për hyrjen e djeshme të Gjuriqit në Kosove dhe hapjen ilegale të pompave të benzinës nga “Naftna Industria Srbije” po ngjan në politiken e viteve të 90-ta kur Kosova nuk ka pas as institucionet e saj as nuk ka qenë shtet.
“Me këto protesta që po i dërgohen BE-së po tentohet të fshehet erozioni i sovranitetit të Kosovës. Si njeri që kam qenë aktiv në rezistencën e viteve 90-ta po më duket e pabesueshme që politika shtetërore e Kosovës edhe sot po vepron në të njëjtën logjikë”, thotë Qirezi, për tesheshi.com.
Portali tesheshi.com ka tentuar të marrë përgjigje nga zyra për informim e policisë së Kosovës se pse nuk e ka arrestuar Gjuriqin, por institucioni që udhëheqet nga kryepolici Shpend Maxhuni nuk është përgjigjur edhe pse ditën e djeshme i janë dërguar pyetjet me shkrim përmes email-it. /tesheshi.com/
