Diego Maradona nuk do t’ia dijë kë ka përpara, nëse mendja i thotë se ka të drejtë. Kësaj rradhe, pjesë e polemikës në të cilën është përfshirë ish-ylli argjentinas i futbollit, është bërë, as më shumë e as më pak, por kompania prestigjoze e modës, Dolce & Gabbana.
Këta të fundit, përpara pak kohësh, organizuan një sfilatë mode, ku modelet mbanin veshur një fanellë të kaltër, me numrin 10 në shpinë dhe me emrin Maradona të shkruar në të.
E kur mediat e interpetuan këtë sfilatë, si respekt për kampionin e madh, vetë Diego, nuk e ka pritur mirë dicka të tillë, duke e konsideruar si shfrytëzim pa konsensus të emrit të tij.
Madje Maradona është ndier i fyer dhe menjëherë ka “nisur” avokatët e tij, për të hapur çështje gjyqësore.
Kështu Stefano Dolce dhe Domeniko Gabbana, do të pëballen në gjyq për idenë “origjinale”, që u përpoqën të realizojnë, kur modelet e tyre sfiluan me bluzën e Maradonës në shpinë.
Mund të jesh i famshëm, mund të jesh më i miri në profesionin tënd, por kjo pak diferencë bën për “të shkrehur” si Diego Maradona, i cili, dinjitetin me sa duket, e ka pikën e dobët. /tesheshi.com/
