Nga Miradie Hasani
Nxënësit shqiptarë në Maqedoni nuk po e kanë fatin që të mësojnë me abetarën e unifikuar, ndryshe nga ç’ndodh në Kosovë dhe Luginën e Preshevës.
Edhe pse është nënshkruar marrëveshje para 5 viteve për përdorimin e kësaj abetareje në Maqedoni ende nuk është hartuar ligji për tekstet shkollore që do të përfshinte edhe abetaren.
Nxënësit e Maqedonisë mësojnë nga abetarja e dikurshme e botuar në vitin 2008 me autor nga Maqedonia.
Përdorimin e kësaj abetare unike në Maqedoni e pengon ligji për tekstet shkollore, procedura e të cilit duhet të kalojë në qeveri e parlament, mirëpo deri më tani kjo procedurë as që ka filluar.
Ndonëse ministri i arsimit është shqiptar, Pishtar Lutfiu, ndërkohë që shqiptar ishte dhe paraardhësi i tij, Abdylaqim Ademi, nga ky dikaster – nën drejtimin pra të shqiptarëve – asnjëherë nuk është ndërmarë iniciativa që të fillojnë procedurat për përpilimin e procedurave të ligjit, për ta çuar atë më pas drejt miratimit; gjë që do i hapte rrugë abetares së unifikuar.
Për më tepër thuhet se nga pala maqedonase nuk ka ndonjë pengesë për kalimin e ligjit. Këtë e ka thënën dhe vetë ish-ministri Ademi.
“Procedurat janë të gjata, duhet të kalojnë edhe ne qeveri pastaj edhe në parlament. Shpresojmë që deri në fund të këtij viti do të mund të miratohet ligji. Nuk duhet të hasë në probleme sepse bëhet fjalë për një tekst të unifikuar, tekst për abetare që nuk ka përmbajtje problematike, sepse këtu bëhet fjalë për mësimin e shkronjave alfabetit të gjuhës shqipe, pasi që gjithë shqiptarët e kanë një alfabet. Nuk pres të ketë ndonjë problem dhe ndonjë rezistencë politike”, pati thënë ministri i atëhershëm i arsimit, Abdylaqim Ademi .
Ndërkohë, edhe ministri aktual Pishtar Lutfiu, thotë se ligji duhet ndërruar por pa saktësuar se kur do ta nisin procedurën.
“Ka disa procedura të cilat duhet të kalojnë. Shpresojmë që vitin e ardhshëm me ndihmën e shteteve tona fqinje do ta tejkalojmë edhe këtë problem”, tha së fundi ministri Pishtar Lutfiu.
Abetarja me të cilën punohet në Maqedoni është me standarde të larta, megjithatë dëshira është më e madhe të punohet me abetaren e unifikuar, gjë që e dëshirojnë vetë arsimtarët. Ata thonë se asnjëherë nuk kanë punuar me abetaren e ashtëquajtur unike, dhe se deri tani nuk kanë pasur rastin ta shfletojnë atë.
“Edhe me këtë abetare është mirë të punohet, kemi standarde të larta, por kishim pas dëshirë edhe ne të punojmë me abetaren e unifikuar”, tha një mësuese e ciklit të ulët.
“Ne deri tani punojmë me abetaren e mëparshme, njëjtë si kemi punuar dhe më parë, nuk ka ndryshime. Por dëshira është që të gjithë të punojmë me abetaren e unifikuar”, tha një mësuese tjetër. /tesheshi.com/
