Nga Mensur Krasniqi
Ka katër ditë rresht që në Kuvendin e Maqedonisë vijon debati për buxhetin e vitit 2016. Si çdo debat tjetër me interes të veçantë për shtetin, edhe ky i djeshmi u zhvillua ndërmjet dy partive më të mëdha maqedonase. Sipas deputetëve të partisë maqedonase në pushtet, VMRO, me buxhetin e vitit 2016 parashihen rritje të bruto prodhimit vendor dhe mjeteve për investime kapitale, si dhe projekte që do të ndërtohen në fushën e shëndetësisë. Nga ana tjetër,opozita ka akuzuar qeverinë se 10 vite me radhë prioritet kanë pasur projekte joprofitabile, siç është “Shkupi 2014” dhe kanë lënë anash projektet për të cilat kanë nevojë qytetarët.
Mirëpo nëse deputetët shqiptarë në Kuvend ia dolën që me heshtje të konfirmojnë propozim-buxhetin e hartuar nga VMRO-ja, nuk arritën dot t’i shpëtojnë akuzave të drejtorit ekzekutiv të Odës Ekonomike Veriperëndimore, Fatmir Bytyqit. Bytyqi, në emisionin Klik Plus të TV21, akuzoi rëndë deputetin e BDI-së, Talat Xhaferin se partia e tij po mbështet një propozim-buxhet jozhvillimor që është hartuar për t’i shërbyer kampanjave të VMRO-së dhe BDI-së para fushatës së zgjedhjeve, e jo qytetarëve, gjegjësisht shqiptarëve.
“Nëse ka një fakt që do të tregonte se ky buxhet është zhvillimorl ne ja japim dorën Xhaferit. Ky buxhet ka disa mangësi. E para është buxhet parazgjedhor; e dyta nuk është zhvillimor, por është social; e treta, mendoj problemi është se se nuk ka program qeveritar të përbashkët , por ka program të partisë VMRO dhe program të BDI-së, që mundohet që të fut në një buxhet dëshirat ose pjesët programore”, tha Fatmir Bytyqi nga OEMVP.
Talat Xhaferi, duke iu referuar Kushtetutës së Maqedonisë, replikoi me Bytyqin duke thënë se shteti në koncept është social dhe se 50% e buxhetit harxhohet për rroga.
“Buxheti është social, ky shtet në koncept është social i përcaktuar me kushtetutë, dhe s’do mend që buxheti duhet të ketë zëra socialë për të mundur të mbështeten aspektet sociale të vendit. Çështja e 15 % për rroga, nuk e kemi shpik ne atë; nuk e kemi shpik ne ujin e nxehtë, mbi 50% e buxhetit është për rroga”, tha Talat Xhaferi nga BDI.
Në emision si mysafir ishte edhe nënkryetari i PDSH-së Bardhyl Dauti, ku ndryshe nga kolegu i tij në taborin kundërshtar, buxhetin për vitin 2016 e quajti diskriminues dhe poshtërues për shqiptarët.
“Të gjitha buxhetet deri sa ka qenë BDI në pushtet, veçanërisht ky i fundit, është skajshmërish diskriminues në raport me shqiptarët, duke i trajtuar maqedonët si potencial, ekonomik, shtetëror dhe të avancuar dhe shqiptaret inferior dhe të skllavëruar, “ tha Bardhyl Dauti nga PDSH.
Pas këtij konstatimi të Dautit, reagoi ashpër Xhaferi duke ndërruar temë, dhe tha se PDSH që nga themelimi e deri sot nuk ka pasur legjitimitet nga shqiptarët në Republikën e Maqedonisë edhe në kohën kur BDI nuk ka ekzistuar. /tesheshi.com/
