Fushata për zgjedhjet vendore të 15 tetorit në Maqedoni ka nisur zyrtarisht nga dita e sotme. Ajo do të zgjasë 20 ditë dhe do të mbyllet më 13 tetor ora 24:00.
Me short në Komisionin Shtetëror të Zgjedhjeve është përcaktuar renditja e partive, koalicioneve dhe kandidatëve të pavarur në fletën e votimit.
Lista me kandidatë për kryetarë të komunave dhe për këshilltarë kanë paraqitur 19 parti dhe koalicione, ndërsa 64 janë nga grupe votuesish.
E para në fletëvotim do të jetë PSDM, i dyti Koalicioni Aleanca për Shqiptarët dhe RDK, i treti BDI, i katërti Koalicioni për Manastirin – BDI, BESA dhe Aleanca e Shqiptarëve, i pesti Koalicioni Së Bashku për Gazi Babë i kryesuar nga BESA, e gjashta LPM, e shtata VMRO-DPMNE, e teta Lëvizja Popullore e Turqve, e nënta Aleanca e Shqiptarëve, e dhjeta është TMRO, e 11-ta Partia Demokratike e Turqve, GROM në vendin e 12-të, Koalicioni i kryesuar nga VMRO-DPMNE është i 13-ti, BESA e 14-ta, PDSH e 15-ta, E Majta e 16-ta, PPD e 17-ta, Lidhja e Romëve e 18-ta, ndërkaq LSDM e 19-ta.
Listat e kandidatëve për anëtarë të këshillave dhe listat e kandidatëve për kryetarë të komunave, do të kenë të njëjtin numër rendor në të gjithë vendin.
Zgjedhjet e gjashta lokale në Maqedoni do të mbahen në 3.480 vendvotime në 80 komuna dhe në Qytetin e Shkupit.
Raundi i dytë i zgjedhjeve apo balotazhi, është caktuar dy javë më vonë, më 29 tetor.
Fushata zgjedhore për balotazhet përfundon më 27 tetor në orën 24. /tesheshi.com/
