Nga Mensur Krasniqi
Koalicioni qeveritar i udhëhequr nga partitë VMRO-BDI dje në mesnatë ka vendosur që të shpërbëjnë Kuvendin e Maqedonisë. Në këtë mënyrë ata kanë vendosur që vendi të shkojë në zgjedhje të parakohëshme parlamentare më 5 qershor, ashtu siç ishte paralajmëruar në Marrëveshjen e Përzhinos ndërmjet katër liderëve të partive më të mëdha në Maqedoni.
Por ky vendim i VMRO-BDI-së nuk është mirëpritur aspak nga partitë opozitare në Maqedoni, si nga blloku politik maqedonas, ashtu edhe shqiptar.
Për liderin e partisë opozitare maqedonase të LSDM-së, Zoran Zaev, pas shpërbërrjes së njëanshme të qeverisë nga VMRO-BDI-ja, tani Marrëveshja e Përzhinos nuk ka asnjë kuptim, andaj këtë marrëveshje e shpallin si të vdekur. Ai madje shtoi që LSDM nuk do të merr pjesë në zgjedhjet e 5 qershorit, meqë sipas tij ende nuk janë plotësuar kushtet për zgjedhje të lira dhe demokratike.
“Nikolla Gruevski në vazhdimësi ka prishur Marrëveshjen e Përzhinos. Reformat në media nuk u pranuan. Nuk dorëzohemi nga principet në të cilët insistojmë. Në emër të principeve në emër të demokracisë. LSDM nuk do të merr pjesë në këto zgjedhje të rrejshme”, deklaroi mbrëmë lideri i LSDM-së Zoran Zaev.
Dhe meqë sipas Zaevit Marrëveshja e Përzhinos konsiderohet si e vdekur, atëherë nuk përjashtohet mundësia që të vazhdojnë edhe me publikimin e bombave (përgjimet e funskionarëve të lartë të pushtetit).
Ndërsa për Lëvizjen BESA, vendimi për shpërbërjen e Kuvendit dëshmon se Maqedonia, nga kriza e thellë politike ka shkuar më tej dhe tash është buzë greminës. Ata thonë se është e dhimbshme që BDI si parti e dalë nga krahu i luftës, edhe njëherë dëshmoi se janë shërbëtor të denjë e të verbër të partisë më antishqiptare VMRO-DPMNE.
“Qëndrimi i Lëvizjes BESA ka qenë konsekuent se më e rëndësishme se data e mbajtjes së zgjedhjeve është krijimi i kushteve për zgjedhje të lira, fer dhe demokratike. Sot lehtë mund të konstatohet se nuk janë krijuar kushtet për zgjedhje të lira andaj përcaktimi i datës për zgjedhje duhej të negociohej dhe të ketë konsensus rreth datës së zgjedhjeve e jo në mënyrë të njëanshme të shpërbëhet Kuvendi. Është e dhimbshme të jesh dëshmitar se si një parti politike shqiptare, siç është BDI, e dalë nga lufta të shndërrohet në shërbëtor të denjë e të verbër të partisë më antishqiptare VMRO-DPMNE”, thonë nga Lëvizja BESA.
Nga ana tjetër, njohësi i rrethanave politike në Maqedoni, Hadi Osmani në një prononcim për portalin tesheshi.com vlerëson se mbetet në duar të partive politike që të sjellin një vendim tjetër unanim për dalje nga kriza politike në Maqedoni, ndryshe opozita mund të vazhdojë me publikimin e skandaleve që mund të shkaktojnë trazira të mëdha në mbarë vendin.
“Kjo është një çështje që tani ju mbetet partive të vendosin politikisht nëse partitë do ta zhytin shtetin në një krizë që ndoshta s’do të ketë kthim, ose do të ulen dhe do të shfrytëzojnë momentet e fundit për të përmirësuar gabimin e mbrëmshëm. E kemi parasysh se çfarë ka në dorë opozita, “bombat” të cilat mund të ndërlikojnë situatën dhe të shkaktojnë edhe trazira. Duhet të thiren juristët dhe të gjejnë një rrugë ligjore që ta kthejnë kuvendin dhe ta normalizojnë situatën”, deklaroi Hadi Osmani.
Bojkotin e zgjedhjeve të parakohshme parlamentare me datë 5 qershor deri tani e kanë paralajmëruar edhe Partia Demokratike Shqiptare dhe Uniteti. /tesheshi.com/
