Drejtuesi i Shtabit Qendror Zgjedhor të BDI-së, Fatmir Besimi, theksoi se Kryesia e kësaj partie ka përcaktuar kandidatët për kryetar komunash si dhe listat e këshilltarëve për pushtetet vendore në komunat ku marrim pjesë.
BDI, sipas tij, në zgjedhjet e 15 tetorit do të garojë me 18 kandidatë për kryetar në Komunat e Likovës, Haraçinës, Çairit, Shuto Orizarës, Studeniçanit, Sarajit, Zhelinës, Tearcës, Jegunovcës, Tetovës, Bogovinës, Vrapçishtit, Gostivarit, Dibrës, Kërçovës, Pllasnicës, Dollnenit dhe të Strugës. Ndërsa në Bërvenicë BDI do të mbështesë kandidatin e pavarur.
“Bashkimi Demokratik për Integrim në këto zgjedhje merr pjesë me 35 lista këshilltarësh nga të cilat tre janë të përbashkëta me parti politike shqiptare – në Ohër, Manastir dhe në Gazi-Babë – në dy të parat – listat kryesohen nga kandidatët tanë.
Me një fjalë, ne në këto gara hyjmë me 729 kandidatë për këshilltarë komunal. Listat janë reflektim i vullnetit të qytetarëve nëpër komuna dhe rezultat i konsultimeve të gjera me degë e këshilla vendorë. Kandidatë posedojnë kredibilitet personal dhe profesional dhe vizion të qartë për të ardhmen e komunave.
Takimi i sotëm është i pari e Shtabit Qendror me kandidatët për kryetarë dhe kryesuesit e listave. Takimi është në funksion të mir organizimit të zgjedhjeve – në sensin që ato të jenë të lira, të ndershme, të besueshme e demokratike, konform standardeve ndërkombëtare”, tha Besimi.
Listat e konfirmuara të kandidatëve duhet të dorëzohen te Komisioni Shtetëror Zgjedhor ku do të konfirmohet renditja në listën e vetme të kandidatëve. Sipas afatit për veprime zgjedhore, shorti për zgjedhjet e gjashta lokale duhet të mbahet me 18 shtator.
Më 25 shtator fillon zyrtarish fushata parazgjedhore për rrethin e parë e cila dhe do të përmbyllet dy ditë para zgjedhjeve të 15 tetorit, ndërsa më 14 tetor do të jetë heshtje parazgjedhore. Fushata për raundin e dytë do të fillojë pas votimit të parë dhe do të përmbyllet më 27 tetor. Votimi për raundin e dytë të zgjedhjeve lokale do të mbahet më 29 tetor. /tesheshi.com/
