Një numër i madh infermieresh të reja në në Maqedoni, kanë nisur ta mësojnë gjuhën gjermane dhe të aplikojnë për punë në këtë vend.
Sipas të dhënave të shoqatës së infermierëve “Për ne”, bëhet fjalë për rreth 3 mijë sosh.
Nga qendra për gjuhë të huaja dhe ndërmjetësim për punësim në Gjermani “Opportunity Center” njoftojnë se interesi për t’u larguar është i madh.
Arsyeja e ikjes qëndron tek kushtet e këqija të punës dhe pagat e vogla.
“A keni dëgjuar të kemi ikje të avokatëve, përmbaruesve, gjykatësve? Kam respekt të plotë për të gjitha profesionet, por përmbaruesit sigurisht nuk do ta lëshojnë vendin. Thjesht, më të goditurat janë drejtimet tona”, vlerësojnë nga Shoqata e Infermiereve të Maqedonisë.
Ministri i Shëndetësisë, Venko Filipçe njoftoi se po punohet në drejtim të luftimit të këtij fenomeni dhese ka biseduar me ministrin gjerman të Shëndetësisë për mundësinë e dërgimit të infermiereve për punësim sezonal disamujor, me kusht që të kthehen përsëri.
Nga ana tjetër, kryeministri Zoran Zaev thotë se me paga më të larta do ta parandalojë braktisjen e kuadrit mjeksorë nga vendi.
“Me paga më të larta dhe me kushte më të mira për specializim dhe mësim praktik do të krijojmë atmosferë që të mos dëshironi ta braktisni vendin dhe të mbeteni në Maqedoni. Kjo është një dëshirë e jona, shpresoj të jetë edhe e juaja”, tha Zaev. /tesheshi.com/
