Skuadra e Jose Mourinho-s sapo ka humbur me Uotfordin, e treta humbje që prej së shtunës së javës së shkuar.
Nuk dihet ende se ç’po ngjet me Mançester Junajtedin, por duket se ekipi është rifutur në krizë. Një cikël krizash që përsëriten herë pas here që prej largimit të Alex Ferguson-it si drejtues i skuadrës.
Uotford – Mançester Junajted ka përfunduar 3-1. Për të zotët e shtëpisë ka shënuar Capoue në minutën e 34-t, Zuniga në të 83-tën, e Deeney me 11-metërsh në minutën e 95-të. Rashford do të barazonte përkohësisht në minutën e 62-të.
Mançester Junajted ka qenë me skuadrën e plotë, por nuk ka mundur të sigurojë as barazimin.
Më 10 shtator, Mançester Junajted humbiste 1-2 në derbin me Mançester Sitin. Të enjten, më 15 shtator, në Holandë, Fejënordi i mposht 1-0 “djajtë e kuq,” për të ardhur te humbja e sotme.
Dy trajnerë kanë humbur detyrën deri tani te Mançester Junajtedi gjatë këtyre viteve të fundit, Moyes e Van Gaal. A po afrohet diçka e tillë për Mourinho-n? /tesheshi.com/
