Mali i Zi ia kalon Shqipërisë në arrestimin e zyrtarëve të lartë të implikuar në korrupsion. Prokuroria ka ndaluar në shtetin fqinj, plot 13 politikanë në drejtim ekzekutiv, që janë përfshirë në raste korrupsioni.
Mali i Zi është një hap më përpara Shqipërisë në integrimin në BE. Të gjithë të arrestuarit i përkasin partisë në pushtet: Partisë Demokratike të Socialistëve, e cila drejtohet nga Milo Gjukanoviç.
Bëhet fjalë për zyrtarët më të lartë të qytetit kryesorë turistik-Budva, dy prëj të cilëve janë familjarë të ish-presidentit të –Unionit Serbi-Mali i Zi, Svetozar Maroviç, i cili përfaqësonte Podgoricën. Ndërkaq në pranga është vënë dhe njeriu i afërt i Kryeministrit Milo Gjikanoviç: Aleksandar Tiçiç.
“Ka arsye për të besuar se të dyshuarit kishin formuar një sipërmarrje kriminale për përfitimin në mënyrë të paligjshme të pasurive”, deklaroi prokurori Milivoje Katniç në një konferencë shtypi.
“Ata i kanë planifikuar veprimet e tyre prej një kohe të gjatë… me role dhe detyra të përcaktuara qartë”, theksoi ai.
Ata janë të dyshuar për manipulim të lejeve të ndërtimit, që kanë shkaktuar miliona euro humbje në buxhetin e shtetit malazez.
Lazar Ragjenoviç, kryetari i bashkisë së Budvës, zona më e njohur turistike e vendit, si edhe administratorja e qytetit, Milena Maroviç-Bogdanoviç ishin në mesin e të ndaluarve.
Ish-kryetarët e bashkive, Rajko Kuljaca dhe Dragan Maroviç, si edhe Aleksandar Tiçiç, këshilltar i kryeministrit Milo Gjukanoviç u arrestuan gjithashtu.
Milena Maroviç-Bogdanoviç është vajza e ish-presidentit malazez, Svetozar Maroviç, ndërkohë Dragan Maroviç është vëllai i tij.
Të dyshuarit ndodhen në ndalim 48-orësh. Avokatët e tyre thanë se të gjithë ata i kishin mohuar akuzat.
Katniç tha se një person tjetër nuk ishte arrestuar pasi ndodhej jashtë shtetit. Ai refuzoi të spekulonte se bëhej fjalë për Svetozar Maroviç.
Mali i Zi, ish-republika e fundit jugosllave e shkëputur nga Serbia, në 2006-tën, ka hapur bisedimet e anëtarësimit me BE-në, por përballet me përsëritjen e kërkesës për luftën kundër korrupsionit në sistem./tesheshi.com/
