Ministria e Brendshme e Malajzisë pohoi një ditë më parë se janë zbuluar një numër varresh në ca kampe të braktisura, të përdorura nga trafikantët e qenieve njerëzore në kufi me Tajlandën.
Ministri Ahmed Zaid Hamidi u tha reportëve në një aktivitet në Kuala Lumpur se këto varre besohet të jenë pjesë e aktiviteteve të trafikimit njerëzor. Ai njoftoi se janë gjetur deri tani 17 kampe të braktisura, por pa dhënë hollësi se sa trupa të vdekur janë zbuluar.
Sipas raporteve mediatike, mendohet se varret masive kanë trupa të qindra emigrantëve nga Mjanmari dhe Bangladeshi.
Autoritetet e kanë pranuar se kishte vite që ishin në dijeni se zona në kufirin mes Malajzisë dhe Tajlandës shfrytëzohej nga trafikantët për kalimin në mënyrë të paligjshme të muslimanëve rohingia (rohingya), pakicës së persekutuar në Mjanmar, të bangladeshasve e emigrantëve të tjerë.
Zbulimi pasoi një tjetër zbulim të ngjashëm më herët këtë muaj në anën tajlandeze të kufirit, ku policia gjeti më e pakta 33 trupa.
Në një njoftim më të fundit të shefit të policisë malajziane, ai bën me dije se janë zbuluar më së paku 28 kampe përgjatë 50 kilometrave të kufirit mes Malajzisë dhe Tajlandës. /tesheshi.com/
