Kampionia e Botës në Xhudo, Majlinda Kelmendi, është shpallur xhudistja më e mirë në Evropë për vitin 2014. Kelmendi, sot edhe zyrtarisht ka marrë çmimin.
Vitin e kaluar, ajo mbrojti titullin e kampiones botërore në Xhudo duke mposhtur në finalen e Kampionatit Botëror në Rusi, Andrea Chitun nga Rumania.
Majlinda për të arritur në këtë finale mposhti fillimisht Vanessa Cortesian nga Venezuela, pastaj Bundma Munkhbaatarin në çerekfinale dhe në gjysmëfinale “shkatërroi” rusen Natalia Kuiutinan që e kishte mposhtur edhe vitin e kaluar.
Majlinda në listën e saj të medaljeve, ka edhe të artën nga Kampionati i fundit Evropian.
Zëvendëskryeministri i Kosovës dhe ministri i Jashtëm, Hashim Thaçi, ka uruar Majlinda Kelmendin për shpalljen si Xhudistja më e mirë në Evropë për vitin 2014.
“Dite e madhe për xhudo heronjtë e Kosovës! Majlinda u shpall më e mira në Europë, për të dytën herë rresht, ndërsa Nora Gjakova, Distria Krasniqi dhe Akil Gjakova do të mbrojnë ngjyrat e Republikës sonë në Lojërat Europiane në Baku. Suksese gjeneratës së artë të xhudos!”, ka shkruar Thaçi në ‘Facebook’./tesheshi.com/
