Deputetja e Partisë Demokratike Majlinda Bregu është zëri më i qartë dhe më i ashpër kritik brenda kësaj partie për mënyrën se si po sillet opozita duke bojkotuar zgjedhjet dhe votimin e Vetingut në Kuvend.
Por duket se zonja Bregu nuk ka ndërmend ta lërë aksionin e saj politik vetëm me disa kritika brenda forumeve apo në media, por do të përgatisë një platformë të qartë për zgjedhjet e reja brenda PD-së për kreun e ri të saj që me statut pritet të mbahen në korrik.
Ajo ishte sonte në darkë e ftuar në Forumet UET ku u pyet se cili do të ishte fati i saj politik; parti e re si Ben Blushi apo përjashtim nga partia si Mesila Doda?
“Unë jam në PD. Kam qënë dhe do jem në PD. Nuk dua të parashikoj larg. Unë nuk gjykoj askënd. As kur iku Mesila. Nuk gjykova as Kastriot Isalmin, ish-themelues i PS-së kur erdhi në PD. Nuk kam gjykuar disa deputetë që brenda një mandati kanë ndërruar tre parti politike. Në fund të gjithë e bëjnë analizën e tyre. E kam të vështirë të jetoj në mjedise rehatie dhe konformizmi nuk më pëlqen”- tha ajo.
“Nuk është fundi që të mos jesh dakord me kryetarin. S’jam as e para, e as e fundit. Ka patur raste të shumta. Dikush e ka gjetur, dikush ka ikur si Blushi për shembull nga PS. Por unë vazhdoj që të mendoj e them se politika është institucionale. Bëhet në institucione revolucioni. Unë kam hyrë në politikë duke besuar që politika, pushteti, Parlamenti janë institucione”- tha ajo duke argumentuar zërin e saj kritik brenda partisë.
Por e pyetur drejpërdrejt se nëse zgjedhjet në PD do të bëheshin sot a do të kandidonte për kryetare të kësaj partie përballë Bashës ajo tha: “Zgjedhjet do të bëhen së shpejti, në korrik, ose për arsye teknike mund të shtyhen në shtator”. Përgjigjen e shoqëroi me hesthje dhe buzëqeshje duke lënë evazive përgjigjen reale nëse do të kandidonte ose jo edhe pse pyetja iu përsërit.
Gjatë fjalës së saj Bregu edhe një herë mbrojti idenë se Basha duhej të pranonte ofertën e propozuar nga Brukseli nga negociatori McAllister, ndërsa u shpreh pesimiste për një rrugë tjetër të re për ta nxjerrë këtë parti nga çadra.
“Për mua refuzimi i asaj marrëveshjeje ishte një gafë shumë e madhe politike sepse nga asnjë marrëveshje nuk do të marrësh dot 100%. Nëse do të ketë një marrëveshje dhe një paketë asnjërë nuk do të dalë 100% i fituar”- tha Bregu.
Gjithashtu ajo cilësoi një gabim të madh dhe bojkotin e Kuvendit dhe mosvotimine Vetingut nga ana e PD-së.
“Mosvotimi i Vettingut do të kthehej në një dëm të madh për PD-në. Fatkeqësisht është kështu. Mirëpo nga ai moment kur kjo marrëveshje u prish, siç e thashë isha dyfish e zhgënjyer, edhe për faktin që e pashë që ishtë shumë e vështirë për të gjetur një zgjidhje më pas. Që nga ai moment me respektin maksimal të sakrificës së të gjithë atyre demokratëve që vazhdojnë të shkojnë në çadër them që në vetvete qëndresa vetëm në një çadër nuk po prodhon ndryshim”- u shpreh deputetja demokrate.
Ajo theksoi se çadra nuk e zëvendëson parlamentin, ndërsa shtoi se bojkoti i zgjedhjeve i opozitës u mor pa u konsultuar me strukturat dhe pa pyetur votuesit e Partisë Demokratike.
Bregu tha se PD mori vendim për të mos hyrë në zgjedhje pa bërë një sondazh brenda partisë se çfarë mendonin votuesit e saj dhe pa u konsultuar me strukturat./tesheshi.com
