Izraeli njoftoi të martën se do të dërgonte “sasi të kufizuara të dozave të papërdorura” të vaksinave COVID-19 tek palestinezët dhe disa vende të tilla si Hondurasi, i cili planifikon të hapë një ambasadë në Jeruzalem.
Izraeli, i cili mban rekordin botëror për numrin e qytetarëve të vaksinuar, tashmë ka injektuar dy doza të vaksinës Pfizer / BioNTech në tre milion njerëz, gati një e treta e popullsisë.
Më 19 dhjetor, Izraeli nisi një fushatë të gjerë dhe të shpejtë vaksinimi pas një marrëveshje me Pfizer që lejon Izraelin të japë miliona doza në këmbim të të dhënave biomjekësore mbi efektin e vaksinës.
“Izraeli ka marrë kërkesa të shumta për ndihmë nga vendet që kërkojnë vaksinat,” tha zyra e kryeministrit Benjamin Netanyahu në një deklaratë, duke shtuar se Izraeli nuk ishte në gjendje të siguronte ndihmë “të rëndësishme” përpara fundit të fushatës së tij të vaksinimit, raportoi AFP
Por “me një sasi të kufizuar të vaksinave të papërdorura të mbledhura në muajin e fundit”, Izraeli ka vendosur të ndihmojë stafin mjekësor të Autoritetit Palestinez dhe atë të disa vendeve, duke u dërguar atyre një sasi simbolike të vaksinave, shtoi deklarata.
Izraeli ka dërguar mijëra doza vaksinash në Bregun Perëndimor të okupuar javët e fundit, për personelin mjekësor palestinez atje.
Sipas Kombeve të Bashkuara dhe organizatave joqeveritare, Izraeli është i detyruar “si një fuqi okupuese” të sigurojë vaksina për 2.8 milion palestinezë në Bregun Perëndimor të okupuar dhe për dy milion banorët e Rripit të Gazës, i cili është nën bllokadën e Izraelit. /tesheshi.com/
