Muhammed Xhibril, një predikues i spikatur, ngjalli zemërimin e autoriteteve egjiptiane ndërsa në fillim të kësaj jave bëri gjatë ritualit fetar një lutje kundër shtypësve në vend dhe në mbarë botën, si dhe kërkoi një ndëshkim hyjnor për “ata që tiranizuan, derdhën gjak, dhe i lanë jetim fëmijët.”
Ai nuk e përmendi në lutjen e tij es-Sisin, rrëmbyesin me dhunë të postit të presidentit, e megjithatë Ministria e Vakëfeve urdhëroi që ai të mos lejohet të predikojë më në xhamitë e administruara prej këtij institucioni shtetëror.
Shejh Muhammed Xhibrili është ndaluar këtej e tutje të drejtojë namaze apo të predikojë. Ministria gjithashtu ka kërkuar ndjekjen e predikuesit, duke e akuzuar atë për mbështetje të ekstremizmit.
Autoritetet e vendit nuk e lejuan dje po ashtu predikuesin të udhëtojë. Muhammed Xhibrili nuk qe në gjendje të ngjitej në avion teksa personeli i aeroportit të Kajros e pengoi atë.
Dhuna shtetërore është e pranishme dukshëm në Egjipt që me rrëzimin e presidentit legjitim, Muhammed Mursit, dy vite të shkuara dhe me ardhjen në pushtet të Abdulfettah es-Sisit. Burgosjet, dënimet me vdekje dhe ekzekutimet e atyre që guxojnë të shprehen kundër regjimit janë tashmë një ritual i zakonshëm në vendin ku “Pranvera Arabe” rezultoi të qe vetëm një ëndërr. /tesheshi.com/
