Mesazhi i drejpërsëdrejtë i Donald Lu-së, dje pasdite, më shumë se një “shfryrje dufi” ishte një mesazh politik i qartë dhe me një drejtim të caktuar.
Ai mesazh ishte i kodifikuar dhe i thënë në një takim për tryezën në drejtësi, kishte të bënte pikërisht me draftin që përkrahin amerikanët, të cilët po negocojnë fuqishëm edhe për ta votuar atë draft.
Ambasadori Amerikan ka ndërmarrë një fushatë personale duke lobuar tek lideri i opozitës, Lulzim Basha, që deputetët e këtij të fundit të japin votat pro për të votuar reformën në drejtësi.
Nëse bindet PD-ja, atëherë do të arrihet ajo që është folur prej kohësh, poli PS-PD, që faktikisht do të ç’faktorizonte Ilir Metën dhe do të krijonte edhe premisat për një pakt tjetër për reformën zgjedhore, për të cilën po flitet që tani se po synohet një proporcional me prag të lartë.
Ndërkaq, Lulzim Basha, mësohet se i është përgjigjur pozitivisht ambasadorit Lu për të votuar pro reformës por ka kërkuar një “plaçkë” të madhe për të bërë kërcimin pindarik që do ta nxirrte zbuluar përballë “ujkut plak”.
Dhe kërkesat kanë qenë me disa shkallë: që nga qeveria teknike që do të përdorej për konsum publik deri tek “koka” e disa ministrave dhe në mënyrë të veçantë e Saimir Tahirit, Ministrit të Brendshëm.
Dhe, ambasadori amerikan ia ka plotësuar menjëherë dëshirën kreut të PD-së, duke folur hapur e qartë ditën e djeshme për dy persona, për të cilët opozita ka akuzuar ministrin e Brendshëm, Saimir Tahiri për favorizim dhe shkelje.
Nëse do të ndodhte kjo, Lulzim Basha do ta quante fitore të madhe pasi Tahiri është ministri më i rëndësishëm i Ramës dhe përbën “xhevahirin” politik në kabinet.
E në fakt, “kokën” e Tahirit e kërkojnë shumë: Meta, të ashtuquajturit senatorë në PS, por edhe kokat mediatike në vend.
Ditën e shtunë, kryeministri Edi Rama ka shkuar në një pallat pranë Liceut Artistik ku banon ish-kryeministri Pandeli Majko dhe ka pirë kafe mbi 60 minuta në një bar aty pranë, pa asnjë person tjetër prezent, madje as shoqëruesit.
Rama ka shkuar vetë, “tek pullë”. Asgjë nuk dihet rreth kësaj bisede, por deduksioni është i qartë: Majko, njeriu që drejton komisionin e miqësisë Shqipëri-SHBA, pra një njeriu i parë me sy të mirë nga amerikanët, është kandidati numër 1 për t`u emëruar ministër i Brendshëm, në situatën kur Tahiri duket se i ka të gjithë kundër, por siç duket dhe ditët e numëruara…/tesheshi.com.
