Lëvizja Socialiste për Integrim nuk ka përkrahur nismat kryesore të kryetarit të Bashkisë së Tiranës, Erion Veliaj, edhe pse është aleatja kryesore në këtë institucion.
Pas qëndrimeve të ndryshme për çështjen e një këndi lojrash tek parku i liqenit artificial, LSI po del me një qëndrim paralel edhe për rikonstruksionin e “Sheshit Skënderbej”.
Veliaj ka shpallur se do të rikthehet projekti i Edi Ramës që u ndërpre në vitin 2011 nga Lulzim Basha dhe LSI ka qenë pjesë e administratës së bashkisë në këtë periudhë.
Kreu i grupit të këshilltarëve të LSI-së, Shezai Rrokaj dhe nënkryetarja e bashkisë, Brunilda Paskali kanë bërë një dëgjesë publike me qytetarët.
Rrokaj theksoi se këto dëgjesa janë të rëndësishme për të marrë një vendimmarrje në interes të qytetarëve.
“Sheshi i Tiranës nuk mendojmë se duhet të ketë për promotor zhvillimi makinat. Ka pak hapësirë për të qenë një shesh që u takon qytetarëve të shijojnë zemrën e territorit të një metropoli siç është Tiranë dhe në këtë kuadër ne mbështesim konceptin për t’ua kthyer sheshin qytetarëve. Ne duam që ky projekt realisht të bëhet i qytetarëve, realisht të realizojë ato elementet të domosdoshme për një shesh të një metropoli. Ne mendojmë që të marrim mendimet e ekspertëve për këtë çështje”, tha Rrokaj.
Nënkryetarja e Bashkisë së Tiranës, Brunilda Paskali theksoi se krahas mendimit të ekspertëve të fushës, edhe qytetarët duhet të ftohen të japin mendimet e tyre që vendimmarrja të jetë në interes të tyre. /tesheshi.com/
