Kryetarit të Bashkisë së Tiranës, Erjon Veliaj, po i ndodh ajo së cilës i frikësohej më shumë, konflikti me LSI-në, të cilin ai ishte munduar ta shmangte dhe kur partia e tij, PS-ja, kishte prishur aleancën e madhe qeverisëse me LSI-në.
Nënkryetarja e bashkisë Brunilda Paskali ka dhënë sot dorëheqjen nga detyra e saj duke deklaruar se LSI është në opozitë edhe në këshillin bashkiak të kësaj partie.
“Pas zhvillimeve më të fundit në Këshillin Bashkiak, ku bashkëpunimi institucional i deritanishëm në shërbim të qytetarëve të Tiranës dhe në përmbushje të detyrimeve që bashkia ka ndaj tyre u zëvendësua me partneritetin individual me dy këshilltarë që kanë vepruar në kundërshtim me qendrimin politik të LSI, misioni LSI në opozitë më obligon në aktin e dorëheqjes si dëshmi serioziteti, detyrimi dhe përkushtimi krah qytetarëve që me verdiktin e tyre i kanë besuar LSI përmbushjen e këtij misioni të rëndësishëm”, tha Paskali.
Vendimi i saj erdhi pasi dy këshilltarë të LSI-së shkelën vendimin e partisë së tyre dhe pranuan të votonin vendimin e propozuar nga Veliaj për rritjen e çmimit të ujit në kryeqytet.
LSI vendosi të përjashtojë nga grupi dy këshilltarët e saj dhe tashmë ka tërhequr dhe numrin dy të bashkisë duke i treguar Veliajt se s’do ta ketë të lehtë qeverisjen pa votat e kësaj partie.
Veliaj u shpreh gjatë fushatës zgjedhore se pavarësisht lojës që luhej në politikën e madhe ai do të bashkëqeveriste në bashki me të gjitha partitë.
“Publiku vërtet i dha një mandat solid një kryetari bashkie, ama kur edhi puna tek këshilli qoftë për të mbajtur edhe këtë kryetar bashkie në një sistem “check and balance”, ia besoi këtë kontroll disa partive. Unë besoj që ky qytet drejtohet më mirë me konsensus se sa me agresion, debate dhe konflikt konstant. Më rezulton që ende pa mbushur dy vjet, qyteti ia ka parë hajrin kësaj fryme bashkëpunimi”- u shpreh Veliaj disa javë më parë./tesheshi.com/
