Nga Blendi Gashi
Zgjedhjet e fundit lokale në Kosovë, si kurrë më parë sollën rezultate tejet të ngushta dhe befasuese ku më së keqi e pësoi PDK-ja e Kadri Veselit e cila nga 38 komuna arriti të fitojë në vetëm pesë prej tyre, dhe ato kryesisht të vogla, si Ferizajn, Dragashin, Shtimen, Kaçanikun, dhe në raundin e parë Drenasin.
Se ky është një rezultat tejet dëshpërues e pranuan krerët e kësaj partie, duke filluar nga kryetari Kadri Veseli, pastaj Xhavit Haliti e zyrtarë tjerë; por që fajësuan bashkimin e partive tjera duke thënë se u bënë bashkë me inat për ta mundur PDK-në duke ditur se në raundin e parë partia e tyre doli fituese në komunat më të mëdha, si Prizren, Mitrovicë, Klinë, Vushtrri, komuna që i humbi në balotazh.
Megjithatë humbja e Prizrenit që e qeverisi nga 2007-ta dhe mosrikthimi i pushtetit në Mitrovicë, janë dështimet më të mëdha të PDK-së për çka edhe vet Veseli në një mënyrë e ka pranuar, edhe pse për qytetin e parë mbajnë shpresat ende tek “votat me kusht”, por që gjasat janë fare të pakta.
Dhe në këto dy qytete janë dy politikanë që punuan me ngulm ta rrëzojnë nga pushteti Veselin, për çka ky i fundit nuk do t’i harrojë sa të jetë pjesë e skenës politike.
“Uragani” Zafë…
Deputeti i NISMA-s, Zafir Berisha, i cili jo rrallë herë quhet në media edhe si “uragani Zafë”, padyshim se është njeriu kryesor që kontribuoi në fitoren e VV-së në Prizren dhe rrëzoi nga pushteti ish-partinë e tij, PDK-në.
Zafa, në çdo debat televiziv, në çdo ditë të fushatës zgjedhore, u betua se nuk do të ndalet deri sa ta heqë PDK-në nga pushteti në qytetin e tij, me arsyetimin se e ka shkatërruar gjatë tre mandateve Prizrenin.
Dhe ashtu siç premtoi Zafa edhe ndodhi, pasi 10% e votave që partia e tij NISMA mori në raundin e parë, u bartën në balotazh tek VV-ja pasi partia e Limajt lidhi koalicion me vetëvendosësit.
“Fitorja në Prizren, është fitore kundër krimit të organizuar”, tha ai të dielën mbrëma pas shpalljes së rezultateve preleminare nga KQZ ku festoi së bashku me Kurtin dhe simpatizantët e NISMA-s e VV-së në qendër të qytetit.
Vërtetë nuk u dorëzua dhe arriti ta lë në opozitë PDK-në, duke e fituar një betejë jo të vogël ndaj Veselit.
Milioneri i AKR-së që sfidoi të “fortët” e PDK-së
Njeriu i dytë që i dha një goditje të fortë Veselit në Lokale, padyshim se është edhe Agim Bahtiri i cili fitoi mandatin e dytë si kryetar i Mitrovicës (vendlindja e kreut të PDK) duke e mposhtur kandidaten Valdete Idrizi.
Veseli, por edhe gjithë PDK-ja kanë qenë tejet të bindur se do e rikthejnë pushtetin në këtë qytet pasi në ranudin e parë dolën të parët, por Bahtiri befasoi të gjithë duke përmbysur rezultatin për çka në çdo paraqitje televizive është shprehur i bindur se do e marrë mandatin e dytë.
“Nuk do ta lejoj Sami Lushtakun asnjëherë më të kthehet në komunë dhe të dirigjojë me komunën”, ka thënë Bahtiri për media pas raportimeve se ish-kreu i Skenderajt po bën fushatë për Valdete Idrizin.
“Po i bëj apel Samiut, por edhe Kadri Veselit – le të largohen nga qyteti. Asnjëherë, në asnjë formë, dhe në asnjë sekondë ata nuk do të kthehen në Mitrovicë”, ishte porosia e Bahtirit.
Ky i fundit ka ironizuar me dy të lartcekurit pas triumfit të sërishëm, ku ka thënë se ka vënë bast me ta se nuk mund t’ia marrin pushtetin.
“Po kam vënë bast me Kadri Veselin më 2013, me Sami Lushtakun më 2017. Kemi vënë bast me nga një palë rroba. Dytë m’i kanë borxh dy palë tesha”, ka thanë Bahtiri, por që mbetet të shihet nëse PDK-istët do ja blejnë teshat, milionerit Bahtiri.
Pavarësisht kësaj, humbja e Prizrenit dhe mosrikthimi i pushtetit në vendindjen e tij, janë disfata tejet të mëdha për Kadri Veselin i cili i vetëdijshëm se gjërat nuk po ecin në rrugën e duhur, ka hapur debatin për zgjedhje e përgjithshme në partinë e tij. /tesheshi.com/
