Ministri i Rendit Sandër Lleshaj, në mënyrë të moderuar, pranoi se kanabisi vijon të lulëzojë.
“Tentativa për ta mbajtur gjallë këtë fenomen, nuk ka vdekur. Fenomeni është goditur rëndë. Gjatë viteve të fundit ka marrë goditje të parikuperueshme, por tentativat, shpresat e ndokujt për të gjetur hapësirë në këtë fushë, për të ushtruar veprimtarinë kriminale nuk kanë vdekur“, tha Lleshaj në një takim me drejtuesit qendrorë e vendorë të policisë.
Ai vendosi një dead line për t’i larë hesapet që në qershor me kanabisin, kudo ku shfaqet, e që më pas sipas tij do ketë tjetër formë përgjegjësie.
“Ne synojmë që brenda muajit qershor, përpjekja e Policisë së Shtetit me kanabisin të mbyllet. Duhet të keni të qartë që afati juaj për ta mbyllur këtë përpjekje është qershori. Pas kësaj nuk do të merremi më me bimët, por do të merremi me personat që kanë përgjegjësi për këtë çështje“, tha Lleshaj.
Kjo direktivë e tij të kujton një ligj të PD-së vite më parë kur qeverisë, ku për çdo zonë ku kultivohej kanabisi do përgjigjej ligjërisht kreu lokal, i bashkisë apo i komunës.
Por Dash Aliko, kreu i Lazaratit, njëherësh figurë e demokratëve lokalë, kurrë nuk u ndëshkua, edhe pse kanabisi lulëzonte e trafikohej pa asnjë problem në fshatin legjendar, njëherësh bastion i PD. /tesheshi.com/
.
