Të hënën e lënë pas, Liverpuli humbiste 3-1 ndaj Lestër Sitit; pesë ditë më pas përsërit të njëjtin rezultat, por këtë herë në favorin e vet.
I fortë me të fortët, Liverpuli ka dalë fitues ndaj Arsenalit. Një takim i mbyllur para pak minutash, i fituar 3-1.
Takimi i vlefshëm për javën e 27-të të kampionatit anglez ka patur për protagonist në pjesën e parë të zotët e shtëpisë, që kanë kryesuar 2-0; Firmino dhe Mane kanë shënuar përkatësisht në minutën e 9-të dhe të 40-të.
Welbeck rihapi lojën në pjesën e dytë për Arsenalin, ndërsa rezultatin e vulosi goli i Wijnaldum-it në minutën e 91-të.
Fitorja bën që Liverpuli ta parakalojë Arsenalin në renditje, megjithëse nuk duhet harruar se topçinjtë kanë një ndeshje më pak të luajtur.
Nga takimet e së shtunës në Premier League, bie në sy barazimi 1-1 i Mançester Junajtedit në shtëpi ndaj Bornmëthit, si dhe fitorja e dytë radhazi e Lestër Sitit. Kampionët fituan 3-1 ndaj Hall Sitit; një tjetër hap në përpjekjen për t’iu larguar vendeve të fundit. /tesheshi.com/
