Deputetët e Listës Serbe kanë vendosur që të kthehen në Parlament pas disa muajsh bojkoti. Kështu ka bërë të ditur shefi i grupit parlamentar të këtij subjekti, Sllavko Simiq. Ai ka deklaruar për Tanjug, se këtë e bëjnë “që t’i shfrytëzojnë të gjitha mundësitë që ta pengojnë formimin e ushtrisë së Kosovës”.
Për kthimin në Kuvend Simiq ka thënë se kanë vendosur, “duke marrë parasysh interesat e popullit serb në Kosovë, si dhe situatën komplekse të politikës dhe sigurisë në Kosovë”.
Për çështjen në fjalë është deklaruar edhe drejtori i të ashtuquajturës Zyra për Kosovën, Marko Gjuriq i cili ka deklaruar sot se respekton vendimin e përfaqësuesve të Listës Serbe.
“Ne e dimë se përfaqësuesit shqiptarë kanë arsyetime lidhur me formimin antikushtetues të ushtrisë. Por nuk mund të bëhet një gjë e tillë, për shkak se përfaqësuesit serbë nuk marrin pjesë në Kuvendin e Kosovës për ushtrinë. Tani përfaqësuesit serbë kanë deklaruar qartë se ata janë duke u kthyer në Kuvend dhe se janë kundër formimit të ushtrisë, dhe për këtë do të bëjnë gjithçka që munden në mënyrë institucionale për të mos e mbështetur”, ka thënë Gjuriq.
Portali ynë ka tentuar të marrë një përgjigje nga deputetët e “Srpska-s”, por ata nuk janë përgjigjur në telefon e as në mesazhet e dërguara. /tesheshi.com/
