Zgjedhjet presidenciale të Serbisë, të cilat pritet të mbahen më 2 prill, do të mbahen edhe në Kosovë, në mjediset ku jetojnë serbët, konfirmuan për radion “Evropa e Lirë”, zyrtarët e Listës Serbe, e cila përfaqëson komunitetin serb në institucionet e Kosovës.
Slavko Simiq, drejtuesi i Listës Serbe dhe shef i grupit parlamentar të këtij subjekti politik në Kuvendin e Kosovës, ka thënë për Radion Evropa e Lirë se një praktikë e tillë, ka ndodhur edhe më parë, për shkakun se shtetësia e dyfishtë u jep të drejtën serbëve të Kosovës që të votojnë për zgjedhjet presidenciale të Serbisë.
Nga ana tjetër, gazetarët nuk kanë arritur të marrin qëndrimin e qeverisë së Kosovës për mbajtjen e zgjedhjeve presidenciale serbe edhe në Kosovë. Por, kryetarja e Komisionit Qendror të Zgjedhjeve të Republikës së Kosovës, Valdete Daka, ka thënë për Radion Evropa e Lirë se lidhur me zgjedhjet presidenciale të organizuara nga Serbia, për të cilat autoritetet serbe kanë paralajmëruar se do t’i hapin vendvotimet edhe në Kosovë, komisioni që ajo drejton nuk ka kurrfarë roli. /tesheshi.com/
