Ajas Sulejmani, personi “i fortë” i cili përplasi me automjetin e tij tek vijat e bardha në zonën e “21 Dhjetorit”, çiftin Konomi dhe foshnjën e tyre 3-muajshe është liruar.
Gjykata e Tiranës ka zbutur masën e sigurisë ndaj tij, nga arrest me burg në arrest shtëpie, duke vendosur që 39-vjeçari të hetohet nën masën e arrestit shtëpiak.
Siç raporton Euronews, në seancën mbajtur këtë të hënë, togat e zeza të kryeqytetit pranuan kërkesën e Suljemanit për masë më të butë sigurie edhe për shkak të normalizimit të marrëdhënieve mes palëve.
Aksidenti ka ndodhur para një semafori, ku mbi vijat e bardha po ecnin kalimtarë. Mes tyre, po kalonte një çift me foshnjën 3-muajshe me karrocë.
Ndërsa automjetet e tjera kishin ndaluar pasi semafori ishte i kuq për automjetet, Mercedes Benz G-Class nën drejtimin e Sulejmanit ka ardhur me shpejtësi duke marrë përpara çiftin së bashku me foshnjen.
Ai u largua menjëherë nga vendi i ngjarjes duke mos u dhënë ndihmën e parë atyre që kishte goditur, duke u justifikuar më pas se kishte rendur drejt spitalit, pasi i ishte tronditur vajza e vogël që kishte me vete.
Kështu, edhe në këtë rast, “të fortët” arrijnë t’i shpëtojnë burgut. /tesheshi.com/
