Lindsay Lohan, një yll i kinematografisë amerikane, ka qenë e ftuar dje në pallatin presidencial në Ankara së bashku me shtatëvjeçaren siriane Bana al-Abed, të bërë të njohur botërisht me “cicërimat” nga Halepi e që së fundi ka gjetur strehë në Turqi.
Lohan dhe al-Abed janë pritur përzemërsisht nga presidenti Recep Tayyip Erdoğan dhe nga bashkëshortja e tij, Emine Erdoğan.
Aktorja amerikane u ka dhuruar mikpritësve distinktivë ku shkruhej, “Bota është më e madhe se pesë,” një referencë për pesë anëtarët e përhershëm të Këshillit të Sigurimit, SHBA-në, Rusinë, Kinën, Francën dhe Britaninë. Një shprehje e përdorur shpesh nga presidenti Erdoğan në shenjë pakënaqësie ndaj së drejtës së përhershme të këtyre shteteve për të marrë vendime botërore.
E njohur për vizitat e saj të shpeshta në Turqi posaçërisht gjatë muajve të fundit, si dhe për interesin e vazhdueshëm për refugjatët sirianë në këtë vend, Lindsay Lohan ka mbetur mjaft e kënaqur nga pritja e çiftit Erdoğan, duke shkruar këto fjalë për 5.8 milionë ndjekësit e saj në rrjetin social Instagram: “Ç’ëndërr që presidenti Erdoğan dhe Zonja e Parë të më ftojnë në shtëpinë e tyre. Përpjekja e tyre në dhënien ndihmë refugjatëve sirianë është vërtet frymëzuese.”
Lindsay Lohan renditet mes atyre që e kanë çmuar dhe lëvduar fort mikpritjen turke për rreth tre milionë refugjatë sirianë.
“Vendet europiane dhe Shtetet e Bashkuara duhet të marrin më tepër përgjegjësi për krizën e refugjatëve, dhe Turqia duhet mbështetur në këtë pikë,” do të deklaronte Lohan në një nga vizitat e shumta të mëhershme në vendin euroaziatik. /tesheshi.com/
