Tmerri u shpalos të enjten në aeroportin e Bangkok, kur këmba e një pasagjereje u kap në një vendkalim në lëvizje(elevator horizontal), ndërsa udhëtarët dhe mjekët përpiqeshin ta lironin.
Për fat të keq, mjekëve iu desh t’ia prisnin këmbën nga gjuri e poshtë për ta liruar.
Siç raporton Daily Mail, pasagjerët që ishin dëshmitarë të këtij incidenti të tmerrshëm u kapën nga paniku kur panë gruan duke tentuar të heqë këmbën e saj e cila i kishte ngecur.
Gruaja 57-vjeçare tajlandeze u ndal mbi valixhen e saj rozë ndërsa po ecte në rripin transportues me këmbën e majtë të kapur, ndodhur kjo në Aeroportin Ndërkombëtar Don Mueang.
“Gruaja do të hipte në një fluturim nga aeroporti Don Mueang i Bangkok për në provincën jugore të Nakhon Si Thammarat të enjten në mëngjes në Terminalin 2,” tha botimi britanik.
Autoritetet e aeroportit kanë urdhëruar një hetim për të përcaktuar shkakun e aksidentit.
Në një deklaratë, Aeroporti Don Mueang tha: “Drejtori i aeroportit dhe menaxhmenti vizituan pacienten në Spitalin Bhumibol për të mësuar rreth trajtimit që ajo po merr nga ekipi mjekësor që ka marrë përsipër”.
Menaxhmenti i aeroportit shprehu gjithashtu keqardhjen më të thellë për incidentin fatkeq dhe theksoi se merr përsipër përgjegjësinë e plotë si dhe të gjitha shpenzimet (hospitalizimi dhe kompensimi).
Gruaja 57-vjeçare tajlandeze u kërkoi mjekëve që t’ia ngjisnin sërish gjymtyrën e saj të amputuar, por ende nuk dihet nëse kjo është e mundur nga ana mjekësore.
Rrugica e lëvizshme është prodhuar nga kompania japoneze Hitachi dhe është instaluar në vitin 1996, tha drejtori i aeroportit, duke shtuar se ka një plan që do të miratohet për ta zëvendësuar atë me një model më të ri në vitin 2025. /tesheshi.com/
