Nga Ylli Pata
Adriatik Llalla nëse nuk largohet nga detyra e kreut të organit të akuzës, që prej ditës së hënë kur hyn në fuqi ligji i ri për Prokurorinë ka kompetenca vetëm administrative dhe honorifike.
Kompetencat e kryeprokurorit janë rrudhur sërish, dhe tani nuk ka mundësi as të caktojë organikën e institucionit të tij.
Në variantin e mëparshëm, ai kishte lirshmëri të përcaktonte numrin e përgjithshëm të prokurorëve, por tani duhet që më parë të marrë leje te qeveria.
Sipas kritereve më të reja në ligj, numri i përgjithshëm i prokurorëve, propozohet bazuar në: “raportin mbi ngarkesën e punës së prokurorëve, duke marrë parasysh edhe rekomandimet e Këshillit të Ministrave për luftën e kriminalitetit gjatë tre viteve të fundit dhe garantimin e veprimtarisë së prokurorisë dhe njëkohësisht sigurimin e aksesit të shtetasve në shërbimin e prokurorisë, rritjen e cilësisë së këtyre shërbimeve, uljen e shpenzimeve dhe përdorimin e të ardhurave në mënyrë efiçente.”
Por përtej kësaj, duhet të merret mendimi më parë i Ministrisë së Financave dhe i asaj të Drejtësisë. “Prokurori i Përgjithshëm dhe Drejtuesi i Prokurorisë së Posaçme në propozimin e numrit të prokurorëve, marrin paraprakisht mendimin e Këshillit të Lartë të Prokurorisë, Ministrisë së Drejtësisë dhe Ministrisë së Financave”, thuhet në draft.
Në variantin përfundimtar kanë ndryshuar sërish kompetencat e kryeprokurorit. Edhe këtë herë ai vijon të ketë rol administrativ, pasi kujdeset vetëm për Prokurorinë e Përgjithshme: “Nxjerr udhëzime të përgjithshme me shkrim për oficerët e policisë gjyqësore, në përputhje me këtë ligj; përcakton strukturën e përgjithshme dhe rregulloren standard të organizimit dhe funksionimit të prokurorive të juridiksionit të përgjithshëm dhe miraton organikën dhe rregulloren e brendshme të funksionimit të Prokurorisë së Përgjithshme, sipas përcaktimeve të nenit 20 të këtij ligji; përfaqëson prokurorinë në marrëdhëniet me të tretët dhe ndihmën e ndërsjellë në çështje penale të juridiksionit të përgjithshëm”, janë disa prej kompetencave.
Një ndryshim thelbësor që është bërë në ligjin për Prokurorinë, është se u është hapur dera prokurorëve të kohës së komunizmit. Aty janë përcaktuar kriteret për të kandiduar në postin e Kryeprokurorit dhe janë hequr një sërë përcaktimesh që kishin të bënin me periudhën komuniste.
Varianti i mëparshëm përcaktonte se kandidati nuk duhet të kishte pasur asnjë lidhje me sistemin komunist, ku kryesorja nuk duhej të kishte qenë prokuror.
Por tani kushti i vetëm është që të mos ketë qenë bashkëpunëtor i Sigurimit të Shtetit: “Të mos ketë qenë anëtar, bashkëpunëtor ose i favorizuar nga Sigurimi i Shtetit përpara vitit 1990”, thuhet në variantin përfundimtar.
Më herët ishte përcaktuar edhe që ai nuk duhet të ketë qenë anëtar ose kandidat i Byrosë Politike, anëtar i Komitetit Qendror të Partisë së Punës të Shqipërisë, anëtar i Presidiumit të Kuvendit Popullor, kryetar i Gjykatës së Lartë, Prokuror i Përgjithshëm, hetues, prokuror, gjyqtar në procese politike, etj. /tesheshi.com/
