Europa League ka ofruar mbrëmë disa rezultate surprizë në ndeshjet e saj me eliminim. Mes të papriturave veçohen humbjet e anglezëve të Manchester United-it dhe të italianëve të Napoli-t. Valencia, në një sezon të përgjumur e të vështirë për të, kujtohet e shpërthen me gola ndaj Rapid-it. Për të veçuar paraqitjen bindëse të gjermanëve të Borussia Dortmund-it, që fituan pastër ndaj Porto-s.
Manchester United-i e ngriti pabesueshmërisht flamurin e bardhë përballë danezëve të Midtjylland-it, duke humbur në sfidën e parë në transfertë. Lëndimi i portierit David de Gea paraqet një tjetër problem për teknikun holandez Luis van Gaal, që tani vërtet i ka ditët e numëruara tek ekipi i famshëm anglez.
Ndërkohë, një tjetër skuadër favorite ka ngecur në ndeshjen e parë. Napoli u gjunjëzua ndaj Villarreal-it
në Spanjë, me të vetmin gol të shënuar nga Denis Suarez tetë minuta para fundit të takimit. E dyta sfidë rresht që Napoli e humbet në minutat e fundit. Një tablo pak a shumë të njëjtë e pamë dhe të shtunën e shkuar në përballjen me Juventus-in në kampionatin italian. Përkundër disfatës, mbrojtësi shqiptar në radhët e napolitanëve, Elseid Hysaj, bëri një tjetër paraqitje të mirë.
Të hapur e la kualifikimin për ndeshjen kthyese edhe Liverpool-i, që barazoi pa gola ndaj Augsburg-ut në Gjermani.
Këto rezultate dhanë ndeshjet e mbrëmshme të Ligës së Europës:
Augsburg – Liverpool 0-0
Galatasaray – Lazio 1-1
Marseille – Ath. Bilbao 0-1
Shakhtar – Schalke 04 0-0
Sion – Sporting Braga 1-2
Sparta Prague – Krasnodar 1-0
Sporting CP – Bayer Leverkusen 0-1
Valencia – Rapid Vienna 6-0
Anderlecht – Olympiakos 1-0
Dortmund – Porto 2-0
Fiorentina – Tottenham 1-1
Midtjylland – Manchester United 2-1
Sevilla – Molde 3-0
St Etienne – Basel 3-2
Villarreal – Napoli 1-0
/tesheshi.com/
