Liderët e tri partive opozitare në një konferencë të mbajtur në sheshin ‘Skëndërbe’ deklaruan se presin që në protestën e nesërme pjesëmarrja e qytetarëve të jetë masive.
Opozitarët kanë premtuar se protesta do të jetë paqësore dhe se nuk do të ndalen deri në largimin e qeverisë.
Kreu i VV-së Visar Ymeri u shpreh se qytetarët duhet të protestojnë për t’i dhënë fundin kësaj qeverie, pasi Mustafa e Thaçi nuk kanë legjitimitet për të qëndruar në pushtet pas vendimit të Gjykatës Kushtetuese.
“Nëse Isa Mustafa nuk jep dorëheqje, do të detyrohet ta bëjë një gjë të tillë nga protestat e qytetarëve”, ka thënë Ymeri.
Kryetari i AAK-së Ramush Haradinaj, ka thënë se protesta do të jetë masive dhe paqësore dhe se është mirë qe edhe koha do të jetë me diell.
Edhe lideri i NISMA për Kosovën, Fatmir Limaj u ka bërë thirrje qytetarëve që të dalin të protestojë kundër marrëveshjeve të dëmshme dhe kundër kësaj qeverie.
Protesta e opozitës së bashkuar që do të mbahet nesër, do të fillojë nga ora 14:00, nga Biblioteka Kombëtare, për të vazhduar para qeverisë./tesheshi.com/
