Justin Trudeau, i biri i ish-kryeministrit Pierre Trudeau, dhe Partia Liberale fituan zgjedhjet e përgjithshme në Kanada.
Liberalët arritën të sigurojnë shumicën parlamentare në zgjedhjet e së hënës, e kështu pritet që 43-vjeçari Justin Trudeau të jetë kryeministri i ri i vendit.
Katër vite më parë, në 2011-ën, liberalët do të pësonin humbjen më të rëndë në zgjedhje, e do ta shihnin veten si parti të tretë, pas Partisë së Re Demokratike. Justin Trudeau do ta merrte drejtimin e partisë dy vite më vonë, për t’i dhënë shpresë asaj për një fitore.
Trudeau ka premtuar të nxisë rritjen ekonomike të vendit, të shkurtojë deficitin buxhetor, e të investojë në infrastukturë.
Në premtimet e tij zë vend dhe përmirësimi i marrëdhënieve me administratën e Obamës, tërheqja e Kanadasë nga misioni luftarak kundër ISIS-it, duke i dhënë përparësi ndihmës humanitare, dhe vënia në vëmendje e ndryshimeve klimaterike.
Kryeministri aktual, konservatori Stephen Harper, e pranoi humbjen, duke mbyllur një nëntëvjeçar të qeverisë së tij në krye të vendit. /tesheshi.com/
