Tre herë kampioni i botës mezi pret të rikthehet si fitues në Formula 1, vetëm pak muaj pas ngjitjes në podium të Nico Rosberg-ut, një rival që tani nuk do ta ketë më nëpër këmbë për shkak të tërheqjes së tij.
Dhe ashtu siç qenë parashikimet, Lewis Hamilton i ka mbizotëruar provat e lira të së premtes në Melburn të Australisë, aty ku të dielën do të zhvillohet gara e parë sezonale.
Hamilton nuk ka patur kundërshtar në këto prova, në të dy sesionet, duke lënë pas Sebastian Vettel-in e Ferrari-t. Diferenca mes tyre ka qenë e konsiderueshme: britaniku ka regjistruar kohën 1:23.620, gjermani nuk ka mundur ta bëjë xhiron më të mirë për më shpejt se 1:24.167.
E njëjta hierarki është respektuar dhe te dy pilotët e tjerë të Mercedes-it e Ferrari-t. Bottas është renditur i treti, Raikkonen i katërti.
Red Bull-i sipas të gjitha gjasave do të jetë forca e tretë e kësaj gare të parë. Renditja në provat e lira e dy pilotëve të tij, Ricciardo e Verstappen, në vend të pestë e të gjashtë, është brenda asaj çka pritet.
Sidoqoftë, provat e lira ndihmojnë vetëm për të dhënë një panoramë të përgjithshme, ndërkohë që provat zyrtare të së shtunës do të tregojnë se në ç’gjendje janë realisht makinat e këtij sezoni. /tesheshi.com/
